दुवै पद नछाड्ने ओलीको अडान, हटाएर देखाउन प्रचण्ड र माधव नेपाललाई चुनौति

१९ असार, काठमाडौं । शुक्रबार बालुवाटारमा नेकपा अध्यक्ष प्रचण्डसँगको तीन घण्टा भन्दा बढी लामो सकारात्मक भनिएको छलफलमा प्रधानमन्त्री केपी शर्मा ओलीले दुवै पद नछाड्ने अडान दोहो¥याएका छन् । चार दिन लामो विवाद उत्कर्षमा पुगेर सिर्जित निर्णायक छलफलमा प्रधानमन्त्री ओली आफू कुनै पनि हालतमा दुबै पद नछाड्ने अडानमा उभिएका हुन् ।

बरु उनले नयाँ महाधिवेशन नभईसकेका बेला आफूलाई दुवै पदबाट हटाएर देखाउन प्रचण्डलाई चुनौति दिएका छन् । स्थायी कमिटी बैठकका बहुमत सदस्यले प्रधानमन्त्रीबाट राजीनामा दिन दबाब दिएका बेला ओलीले कुनै हालतमा पद नछाड्ने बताएको बालुवाटार स्रोतले जनाएको छ ।

यसअघि २०७५ जेठ २ गते र २०७६ मंसिर ४ गते भएका दुबै सहमतिअनुसार अगाडी बढ्नुपर्नेमा प्रचण्डले जोड दिएपनि ओलीले त्यसलाई बेवास्ता गरेका छन् । अहिलेको अवस्थामा प्रधानमन्त्री र पार्टी अध्यक्ष पदमा आफ्नो निरन्तरता एकमात्रै विकल्प भएको भन्दै ओलीले यस्तो संकटको बेला पद नछाड्ने बताएका हुन् ।

ओलीको चट्टानी अडान अगाडी प्रचण्ड फेरि पनि झुक्नुपर्ने अवस्था आएको छ । विगतका सहमति कार्यान्वयन नगर्ने भए अब नयाँ सहमति गर्नुपर्ने प्रचण्डको भनाई छ । तर ओलीले त्यसप्रति पनि चासो देखाएका छैनन् । स्थायी कमिटी बैठकका बहुमत सदस्यले राजीनामा माग गरेपनि त्यसप्रति कुनै चिन्ता नभएको ओलीको भनाई छ ।

संसद नभएपछि हाइसञ्चो !

पार्टी स्थायी समिति बैठकबाट ओलीलाई राजीनामाको निर्देशन दिन लगाएर प्रचण्ड, माधव नेपाल लगायतका नेताहरुले उस्तै परे संसदमा अविश्वासको प्रस्ताव लैजाने मनस्थिति बनाएका थिए । तर यो संकेत पहिल्यै थाहा पाएका ओलीले संघीय संसदका दुवै अधिवेशन बिहीबार नै अन्त्य भएको घोषणा गरिदिए ।

राष्ट्रपति विद्यादेवी भण्डारीको समेत साथ पाएका ओलीले बिहीबार केही घण्टामै नेपालको सार्वभौम सत्ताको मुख थुन्न लगाए । प्रतिपक्षी दल कांग्रेस, सभामुख अग्नि सापकोटा, राष्ट्रियसभा अध्यक्ष गणेशप्रसाद तिमिल्सिनालाई समेत थाहा नदिएर ओलीले संसदको बजेट अधिवेशन अन्त्य भएको घोषणा गरेका हुन् । जसको विरोधमा कांग्रेस छ ।

मन्त्रिपरिषदबाट पठाएको सिफारिस हत्तपत्त राष्ट्रपति विद्यादेवी भण्डारीले अनुमोदन गरेर संसद सचिवालयलाई पत्र पठाएपछि ओलीको चाहाना पूरा भएकाे थियो । जसले प्रधानमन्त्री ओलीलाई दुबै पदबाट हटाउने प्रचण्ड लगायत नेताहरुको सपना पूरा हुन असम्भव बनाईदिएको छ ।

स्थायी कमिटी बैठकमा जति नै राजीनामा माग गरेपनि संसद नभएका कारण ओली आफू प्रधानमन्त्री पदबाट नहट्नेमा ढुक्क छन् । संसद नभएका कारण पार्टीको निर्णय कार्यान्वयन नहुने ओलीको भनाई छ । जसले फेरि एकपटक आफू नै सर्वेसर्वा बन्ने र अरुलाई नेता नै नठान्ने प्रवृत्ति ओलीमा हावी भएको छ । अरुलाई पेलेरै निर्णय गराउन बानी परेका ओलीलाई यसले कतिदिन सत्तामा टिकाइरहन सक्छ ? त्यो भने हेर्न बाँकी छ ।