नेकपाको स्थायी समिति बैठक आज, ओली-प्रचण्डबीच थप भिडन्तको सम्भावना

२० असार, काठमाडौं । सत्तारुढ नेकपाको स्थायी कमिटी बैठक आज बस्दैछ । बालुवाटारमा बिहान ११ बजे बस्ने बैठकमा प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच अर्को भीडन्त हुने सम्भावना छ ।

स्थायी कमिटी बैठकबाटै देखिएको असन्तुष्टि र विवाद समाधान गर्न दुई दिन बैठक स्थगित गरिएपनि सहमति हुन सकेन । नेताहरुबीच छलफल भएपनि ठोस सहमति नहुँदा आजको स्थायी कमिटी बैठकमा पनि ओली र प्रचण्डबीच चर्काचर्की हुने सम्भावना छ ।

गएको मंगलबार बसेको स्थायी कमिटी बैठकमा प्रचण्ड, झलनाथ खनाल, माधव नेपाल लगायतका बहुमत स्थायी समिति सदस्यले प्रधानमन्त्री ओलीको राजीनामा माग गरेका थिए । त्यसयता नेकपाभित्र चर्केको विवाद मत्थर हुनुको साटो झन झन बढ्दै गएको छ ।

शुक्रबार दिउँसो पनि ओली र प्रचण्डबीच तीन घण्टा बढी छलफल भएको थियो । तर बैठकमा ठोस सहमति हुन नसकेको नेताहरुको भनाई छ । आफूलाई फेरि पनि बेवास्ता गरेपछि प्रचण्ड लगायतका नेताहरुले स्थायी कमिटी बैठकमा फेरि राजीनामा माग चर्काउने सम्भावना छ ।

ओलीले संसदको बजेट अधिवेशन अन्त्य गरेर पार्टीको निर्णय नमान्ने स्पष्ट संकेत दिएका छन । यसले नेकपाभित्रको विवाद थप चर्किएको छ । आजको स्थायी कमिटी बैठकमा पनि त्यही विवादले निरन्तरता पाउने सम्भावना छ ।