राष्ट्रपतिलाई भेट्न प्रचण्ड, नेपाल र खनाल शीतल निवास

२१ असार, काठमाडाैं । प्रधानमन्त्री केपी शर्मा ओलीको राजीनामा माग गरिरहेका नेकपाका नेताहरु राष्ट्रपति विद्यादेवी भण्डारीलाई भेट्न शीतल निवास पुगेका छन् ।

ओलीको राजीनामा माग गरिरहेका नेकपाका अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल र झलनाथ खनाल आइतबार बिहान ११ बजे नै शीतल निवास पुगेका हुन् ।

दल विभाजन सजिलो हुने गरी अध्यादेश ल्याउने तयारी प्रधानमन्त्री ओलीले गरिरहेको र सो अध्यादेश राष्ट्रपतिकोमा पुगेको भन्ने सूचना शीर्ष नेताले पाएको दाबी गरिएका बेला प्रचण्डसहितका नेताहरु शीतल निवास पुगेका हुन् । अहिले राष्ट्रपतिसँग उनीहरुले सो विषयमा छलफल गरिरहेको स्रोतले जनाएको छ ।

यसअघि गएको बिहीबार पनि प्रचण्डले शीतल निवास पुगेर राष्ट्रपति भण्डारीसँग भेट गरेका थिए ।  प्रधानमन्त्री केपी शर्मा ओलीले शनिबार साँझ बालुवाटारमा मन्त्री र राज्यमन्त्रीहरुलाई बोलाएर आफू र राष्ट्रपतिलाई हटाउने षडयन्त्र भइरहेको बताएका थिए । त्यसअघि ओली राष्ट्रपति भण्डारीलाई भेटेर फर्केका थिए ।

त्यसक्रममा उनले राष्ट्रपतिविरुद्ध समेत खुमलटारमा प्रचण्ड पक्षधर नेताहरुले षडयन्त्र गरेको आशय व्यक्त गर्दै जुनसुकै कदम चाल्नुपर्ने बताएका थिए । प्रधानमन्त्रीलाई सम्झाउनका लागि पनि तीन नेताले राष्ट्रपतिमार्फत आग्रह गर्ने सम्भावना रहेको छ । पछिल्लो समय नेकपाको विवादमा राष्ट्रपति पनि मुछिएकी छन् ।