ओली र प्रचण्डबीचकाे कहल साम्य पार्न बालुवाटारमा निणार्यक वार्ता सुरु

२१ असार, काठमाडौं । सत्तारुढ नेपाल कम्युनिस्ट पार्टी ‘नेकपा’का दुई अध्यक्ष केपी शर्मा ओली र पुष्पकमल दाहाल प्रचण्डबीच निणार्यक वार्ता सुरु भएकाे छ ।  सत्तारुढ दलभित्रको आन्तरिक कहल साम्य पार्ने प्रयासस्वरुप आइतबार दुई पक्षबीच वार्ता भइरहेकाे छ ।

राष्ट्रपति विद्यादेवी भण्डारीलाई भेटेर शीतल निवासबाट निस्किएका प्रचण्ड सिधै प्रधानमन्त्री निवास बालुवाटार पुगेका हुन् । पार्टी फुट्न नदिने उपाय खोज्न निर्णायक भनिएको वार्ता केही बेर अघिदेखि शुरु भएको छ ।

बालुवाटार स्रोतका अनुसार दुई अध्यक्षको तर्फबाट दुई–दुईजना सहयोगी नेताहरु समेत निणार्यक वार्तामा राखिएकाे छ । जसमा ओलीको तर्फबाट विष्णु पौडेल र शंकर पोखरेल छलफलमा सहभागी भएका छन् भने प्रचण्डको तर्फबाट वर्षमान पुन र जनार्दन शर्मा सहभागी छन् ।

यसअघि शुक्रवार दुई अध्यक्षबीचको वार्तामा विष्णु पौडेल र जनार्दन शर्मा सहभागी थिए । तीन घण्टासम्म चलेको सो छलफलले कुनै निष्कर्ष निकाल्न सकेकाे थिएन । नेकपा स्थायी कमिटी बैठक सोमबार बस्दैछ । त्यसअघि नै सहमति जुटाउन उनीहरुमाथि दबाव छ ।

अहिले बालुवाटारमा भैइरहेकाे निर्णायक वार्तामा तेस्रो तथा नयाँ विकल्पका रूपमा मंसिर ४ मा भएको सहमति कार्यान्वयन गर्दै प्रधानमन्त्री ओलीले पार्टीको म्यान्डेट बाहिर नगई सरकार चलाउने, सरकार सञ्चालन गर्न माधव कुमार नेपाल, झलनाथ खनाल, वामदेव गौतम लगायतका नेता रहेको ५ सदस्यीय कार्यदल गठन गर्ने, केही मन्त्री र मुख्यमन्त्री हेरफेर गर्ने विषयमा छलफल हुनेछ । यस्तै आजको वार्ताले यसबारे निकास नदिए पार्टी विभाजनको चरणमा प्रवेश गर्ने सम्भावना रहेकाे छ ।