कांग्रेस नेतालाई देउवाको स्पष्टोक्ति- ‘ओलीलाई सरकारमा जाने बचन दिएको छैन’

२१ असार, काठमाडौं । सत्तारुढ नेकपा आन्तरिक सत्ता संकटमा फसेपछि प्रधानमन्त्री केपी शर्मा ओलीले प्रतिपक्षी दल नेपाली कांग्रेससँग सहयोग मागेका छन । तत्कालका लागि आलोपाले सरकार सञ्चालन गर्ने सहमतिका साथ अगाडी बढ्ने प्रस्ताव प्रधानमन्त्री ओलीले गरेपनि आफूले कुनै बचन नदिएको कांग्रेस सभापति देउवाले बताएका छन ।

सत्ताको गठजोडमा कांग्रेसको पनि नाम जोडेर सञ्चारमाध्यममा समाचार आएपछि देउवासँग कांग्रेस नेताले जवाफ माग गरेका थिए । जवाफमा देउवाले आफूले कसैलाई पनि सरकार जोगाउने, सरकारमा जाने र साथ दिने बचन नदिएको बताएका छन ।

आइतबार पार्टी कार्यालय सानेपामा बसेको कांग्रेस केन्द्रीय समिति बैठकमा बरिष्ठ नेता रामचन्द्र पौडेलसहित केन्द्रीय सदस्यहरूले सभापति देउवासँग सत्ता गठजोडबारे प्रश्न गरेका थिए । उनीहरुले ओलीसँग भित्रभित्रै सहमति र सल्लाह गर्ने गरेको भन्दै यसबारे पार्टीमा जानकारी नगराएकोमा आपत्ति जनाएका छन ।

तर धेरै कांग्रेस नेताले नेकपाको फुट र सरकारमा जाने कांग्रेसको योजनालाई गम्भिर ढंगबाट सल्लाह गरेर अघि बढ्नुपर्नेमा जोड दिएका छन । प्रधानमन्त्री ओलीले प्रचण्ड र माधव नेपालसँग सम्बन्ध चिसिएपछि कांग्रेससँग सत्ता साझेदारी गर्ने योजना बनाएका छन ।

यसका लागि उनले आइतबार गृह र अर्थ मन्त्री काग्रेसलाई दिने प्रस्तावसहित सुवासचन्द्र नेम्वाङलाई देउवा निवास पठाएका थिए । तर कांग्रेसले सरकारमा जाने विषयमा निर्णय गर्न सकेको छैन ।