दुर्गम जिल्लामा ड्रममै डिजेल बिक्रीका लागि आह्वान

२२ असार, काठमाडौं । नेपाल आयल निगमले दुर्गम जिल्लामा ड्रममा डिजेल राखेर कारोबार गर्न ‘प्याक्ड बिक्रेता’ का रूपमा अनुमति लिन निवेदन खुलाएको छ । प्याक्ड बिक्रेताअन्तर्गत अनुमति लिएकाहरूले डिजेलको मात्र कारोबार वैधानिक तरिकाले गर्न पाउँछन् ।

कुनै प्याक्ड बिक्रेताले जमिनमुनि ट्यांकी गाडेर पम्पसहित गुणस्तर तथा नापतौल विभागबाट अनुमति लिएर काम गर्ने व्यवस्था छ । निगमका प्रवक्ता विनितमणि उपाध्यायले दुर्गम जिल्लामा ड्रममा डिजेल राखेर कारोबार गर्नका लागि प्याक्ड विक्रेता नियुक्त गर्नका लागि आवेदन खुला गरिएको जानकारी दिए ।

दुर्गम जिल्लाका जनतालाई डिजेलका कारण अप्ठ्यारो नहोस भनेर आवेदन खुला गरिएको उनको भनाइ छ । नेपाल सरकारले दुर्गम भनेर घोषणा गरेको २१ जिल्लामा, जहाँ सडकको अवस्थाले गर्दा विकास निर्माणको काम, सामान ढुवानी तथा अन्य कामको लागि सजिलै ड्रममा डिजेल किन्न पाउने व्यवस्था गरिएको छ ।

प्याक्ड बिक्रेताले पनि कम लगानीमा ३ देखि ४ हजार लिटर डिजेल खरिद गरी आवश्यकताअनुसार एक लिटरदेखि २० लिटर सम्मका ड्रममा राखेर बिक्री गर्न सक्छन् । यसका बिक्रेताले गुणस्तर नापतौलबाट प्रमाणित गरेका ड्रमहरू प्रयोग गर्नुपर्ने निगमले बताएको छ ।

पेट्रोलियम पदार्थको कारोबार गर्ने दुर्गमका जिल्लाहरू दार्चुला, मुगु, दैलेख, बझाङ, कालिकोट, जाजरकोट, बाजुरा, डोल्पा, हुम्ला, जुम्ला, मनाङ, मुस्ताङ, रुकुम पूर्व, रुकुम पश्चिम, रोल्पा, संखुवासभा, खोटाङ, भोजपुर, ओखलढुंगा, अछाम र सोलुखुम्बुलगायत छ । दुर्गम जिल्लाका लागि स्थानीय व्यवसायीले निगमको प्याक्ड बिक्रेता नियुक्त भइ पेट्रोलियम पदार्थको कारोबार गर्न सक्नेछन् ।

जसमा इच्छुक व्यक्ति तथा संस्थाले निगमको सम्बन्थित प्रादेशिक कार्यालय वा केन्द्रीय कार्यालयमा निवेदन दर्ता गर्ने सकिने व्यवस्था मिलाएको जनाइएको छ । कारोबार