नेकपाको स्थायी कमिटी बैठक आज बस्दै

२४ असार, काठमाडौं । सत्तारुढ नेपाल कम्युनिष्ट पार्टी नेकपाको स्थायी कमिटी बैठक आज बस्दैछ । गएको १७ गतेदेखि रोकिएको स्थायी कमिटी बैठक एक हप्तापछि आज बस्न लागेको हो । बिहान ११ बजे बालुवाटारमा बस्ने स्थायी कमिटी बैठकमा नेताहरुको आन्तरिक असन्तुष्टि मत्थर पार्ने प्रयास हुनेछ ।

स्थायी कमिटी बैठकमा अध्यक्ष प्रचण्ड, बरिष्ठ नेता माधव कुमार नेपाल लगायतका नेताहरुले प्रधानमन्त्री केपी शर्मा ओलीको राजीनामा माग गरेपछि बैठक प्रभावित भएको थियो । त्यसयता ओलीको राजीनामाले नेकपाको आन्तरिक राजनीति समेत तरंगित छ ।

ओलीले पार्टी अध्यक्ष र प्रधानमन्त्री पदबाट राजीनामा नदिने बताएपछि प्रचण्ड र माधव नेपालले बहुमतका आधारमा हटाउने चेतावनी दिएका थिए । सोही चेतावनीका कारण ओलीले संसद अधिवेशन अन्त्य गरेभने स्थायी कमिटी बैठक पनि स्थगित गरेका थिए ।

त्यसयता निरन्तर अध्यक्ष ओली र प्रचण्डबीचमा छलफल भइरहेको थियो । यसअघि मंगलबार बालुवाटारमा बसेको अध्यक्षद्धयको बैठकले स्थायी कमिटी बैठक नरोक्ने सहमति गरेका कारण आजदेखि बैठकले निरन्तरता पाउन लागेको हो ।