राष्ट्रपतिद्धारा विपद् व्यवस्थापनलाई प्रभावकारी बनाउन जोड

काठमाडौं । राष्ट्रपति विद्यादेवी भण्डारीले गृह मन्त्रालयका पदाधिकारीसँग मनसुनजन्य विपद्को सामनाका लागि पूर्वतयारी तथा बाढी, पहिरो र डुबानबाट भएका क्षति एवं प्रभावितको उद्धार, राहत तथा पुनःस्थापनासम्बन्धी कामबारे चासो व्यक्त गरेको छन् ।

मन्त्रालयका सचिव महेश्वर न्यौपाने, मन्त्रालयअन्तर्गतको विपद् न्यूनीकरण तथा व्यवस्थापन प्राधिकरणका कार्यकारी निर्देशक अनिल पोखरेलसहितको टोलीसँग राष्ट्रपति कार्यालयमा भएको भेटमा राष्ट्रपतिले प्रकोप जोखिम न्यूनीकरणका लागि सरोकार निकायसँगको समन्वयमा आवश्यक प्रविधि र उपकरणको समुचित प्रबन्ध गर्दै विपद् व्यवस्थापनलाई प्रभावकारी बनाउनुपर्नेमा जोड दिए ।

उनले दिगो विकासलाई ख्याल नगरी प्राकृतिक स्रोतको अनियन्त्रित दोहनले पनि प्राकृतिक विपद्को जोखिमलाई बढाएको उल्लेख गर्दै सम्बन्धित विशिष्टीकृत निकायको अध्ययन र सुझावका आधारमा सडक, आवास तथा बस्ती निर्माण गर्नुपर्नेमा सम्बन्धित निकायको ध्यान आकृष्ट गराए ।  भूकम्प, महामारी जस्ता आकस्मिक तथा बाढी, पहिरो, डुबान र आगलागी जस्ता मौसमी प्रकृतिका विपत्तिको जोखिम न्यूनीकरणका लागि नेपाल सरकार, मन्त्रालय र प्राधिकरणले गरेको पूर्वतयारी र उद्धार तथा राहतका लागि गरेका प्रयत्नको प्रशंसा गर्दै राष्ट्रपतिले हालैका दिनमा बाढी तथा पहिराबाट भएको जनधनको क्षतिप्रति दुःख व्यक्त गरेको राष्ट्रपतिको सचिवालयले जनाएको छ ।

त्यस अवसरमा राष्ट्रपति भण्डारीले कोभिड –१९ को महामारी नियन्त्रणका लागि नेपाल सरकारले गरेको प्रयासको सराहना गर्दै महामारी रोकथाम र नियन्त्रणमा अझ बढी सफलताका लागि सम्बद्ध सबै पक्ष थप समन्वयात्मक रूपमा अग्रसर हुनुपर्ने पनि बताए ।