साताको पहिलो दिन सुखद सुरुवात तर के छन् सकारात्मक र नकारात्मक पक्ष ?

काठमाडाैं । यो साता पनि शेयर बजारले सुखद सुरुवात गरेको छ । साताको पहिलो दिन आईतबार नेप्से परिसूचक ९ दशमलव ०२ अंकले वृद्धि हुँदै १३४० दशमवल २९ को विन्दुमा बन्द भएको छ । दोश्रो बजार शुन्य दशमलव ६८ प्रतिशतले वृद्धि हुँदा १ अर्ब ११ करोड माथिको शेयर कारोवार भएको थियो । आज १७९ कम्पनीका २६ लाख ७८ हजार कित्ता शेयर खरिद बिक्री भएका थिए ।

सुरुवाती चरणमा बजारमा राम्रो उतारचढाव देखिएको थियो । बजार १३३१ दशमवल ३२ को विन्दुमा खुलेकोमा ११ बजेर ३१ मिनेटमा १३५१ दशमलव ८३ को उच्च विनु समातेको थियो । त्यसपश्चात भने बजारले धेरै पटक माथि जान खोजे तापनि सकेको थिएन । बजार वृद्धि भए पनि खरिदकर्ता र बिक्रीकर्ताको समान उपस्थिति जस्तै थियो ।

त्यस्तै आजको न्यून विन्दु र खुला विन्दु एकै भएकाले बजारमा अस्तिको साताको अन्तिम कारोवार दिन भन्दा बजार बलियो हुँदै गएको प्रस्ट देखिन्छ र सुरुवाती चरणमा बनेको उच्च विन्दुलाई पछि २ पटकको प्रयास गर्दा पनि त्यो विन्दुको छेउ पुग्न नसक्नुलाई भोली सुरुवाती चरणमा केही बिक्रीकर्ताहरु आउन सक्ने सम्भावना देखिन्छ।

आज बजार वृद्धि हुँदा कारोवार रकम पनि १ अर्ब माथि पुग्यो । बजार वृद्धिलाई कारोवार रकमले साथ दिंदै जानु राम्रो पक्ष हो।

आजको मैनबत्तीले बजारमा उतारचढाब कम रहेको जानकारी दिएको छ । बजार १३१० भन्दा माथि स्थिर हुनु नै बजार सकारात्मक क्षेत्रमा रहेको जानकारी दिएको छ । बजार हाल १३६२ को प्रतिरोध क्षेत्र नजिक रहेको छ । दैनिकी अवधिमा “आरएसआई” ५२ दशमलब ०८ को बिन्दुमा छ। यो अक्सिलेटरले बजार हालसम्म सकारात्मक रहेको जानकारी दिएको छ । “एडिएक्स” ले बजार निश्चित रुपमा बढी हाल्ने संकेत नगरे पनि जोड / बिजोड “डाइरेक्सनल इन्डेक्स”हरुले बजारमा हालसम्म क्रेताको चाप रहेको जानकारी गराएको छ । “अन ब्यालेन्स भल्यूम” ले बजारमा क्रेताको चाप हुन थालेको जानकारी गराएको छ । नेप्से बढेमा पहिलो प्रतिरोध १३६२ को क्षेत्रमा पाउने देखिन्छ र घटेमा पहिलो टेवा १३३३ को क्षेत्रमा पाउने देखिन्छ।

आज वाणिज्य बैंकको उपसुचक, होटल, विकास बैंक, हाईड्रोपावर र म्युअचल फण्ड उपसुचकमा गिरावट आएको छ भने लघुवित्त उपसुचकमा सर्वाधिक वृद्धि देखिएको छ।

नेपाल लाईफ इन्स्योरेन्सको सर्वाधिक कारोवार भएको छ। नेपाल लाईफ इन्स्योरेन्सको कम्पनीको १६ करोड ५ लाखको शेयर किन बेच भएको छ भने दोश्रोमा नेपाल पुनर्बीमा कम्पनीको १४ करोड ३४ लाख बाराबारको शेयर कारोवार भएको छ ।

सुर्योदय लघुवित्तको शेयर मूल्य सर्वाधिक ९ दशमलव ९९ प्रतिशतले वृद्धि भएको छ भने तिनाउ मिसन डेभलप्मेण्ट बैंकको शेयर मूल्य ५ दशमलव ७६ प्रतिशतले घटेको छ ।

नोट : निर्णय लिनु अघि थप अनुसन्धान गर्नु होला !