भारतीय मिडियाले अब नेपालबाट सिक्नुपर्छ : शेखर कोइराला

काठमाडौं । नेपाली कांग्रेस नेता डा. शेखर कोइरालाले नेपालप्रति भारतीय मिडियाको उच्छृङ्खल प्रस्तुति खेदजनक रहेको बताएका छन । सामाजिक सञ्जाल ट्वीटरमा लेख्दै नेता कोइरालाले प्रधानमन्त्री केपी शर्मा ओली र नेपालका लागि चिनियाँ राजदुत होउ यान्छीलाई जोडेर आपत्तिजनक सामग्री बनाउनु खेदजनक रहेको टिप्पणी गरेका हुन ।

भारतीय मिडियाको तुलनामा नेपाली मिडिया धेरै सभ्य, सुशोचित र सम्मानित रहेको कोइरालाको भनाई छ । मिडियाको जिम्मेवारीका बारेमा भारतीय मिडियाले नेपाली मिडियाबाट सिक्नुपर्ने पनि उनले सुझाव दिएका छन ।

‘केही भारतीय मिडियाले नेपालका प्रधानमन्त्रीको चरित्रहत्या गर्ने र दुई देशको सम्बन्धमा आँच आउने सामग्री प्रसारण गर्नु दुःखद् कुरा हो । मिडियाको जिम्मेवारी उनीहरूले नेपालबाट सिक्नुपर्ने देखिन्छ’ कोइरालाले ट्वीटमा लेखेका छन ।

केही भारतीय सञ्चारमाध्यमले प्रधानमन्त्री ओली र राजदूत यान्छीका विषयमा आपत्तिजनक सामग्री बनाएपछि भारतीय न्युज च्यानलमाथि वितरकले प्रतिबन्ध लगाएका थिए । पछिल्लो समय अरु भारतीय न्युज च्यानलमाथिको प्रतिबन्ध हटाएपनि जीन्युजमाथिको प्रतिबन्ध भने अझै हटेको छैन् ।