अयोध्या–राम काण्डपछि ओली र प्रचण्डबीच बालुवाटारमा वार्ता शुरु

काठमाडौं । भगवान राम नेपालमै जन्मेका र अयोध्या नेपालमै रहेको विवादास्पद बोलीले नेपाली राजनीति तरंगित भएका बेला प्रधानमन्त्री केपी शर्मा ओली र प्रचण्डबीच बालुवाटारमा वार्ता शुरु भएको छ । नेकपाका अध्यक्षद्धयबीच बालुवाटारमा केही बेरअघिदेखि वार्ता शुरु भएको नेताहरुले बताएका छन ।

गत बुधबार भएको छलफलपश्चात झण्डै एक हप्तापछि ओली प्रचण्डबीच फेरि भेटवार्ता भएको हो । प्रधानमन्त्री र अध्यक्ष पदबाट ओलीको राजीनामा माग गरेपछि नेकपाको स्थायी कमिटी बैठक असार १८ गतेदेखि बस्न सकेको छैन । त्यसयता तीन पटक बैठक सारेपनि बस्न नसकेपछि साउन २ गतेसम्म लागि बैठक स्थगित नै गरिएको छ ।

यसबीचमा प्रचण्ड चितवन पुगेर आए भने ओलीले विभिन्न औपचारिक कार्यक्रममा विवादास्पद अभिव्यक्ति दिएर चर्चा र आलोचना निम्त्याए । आगामी साउन २ गते बस्ने स्थायी कमिटी बैठकको लागि वातावरण बनाउन ओली प्रचण्डबीच बालुवाटारमा बैठक शुरु भएको नेताहरुको भनाई छ ।

नेकपामा तत्कालका लागि पार्टी फुट्ने सम्भावना टरेपनि दुई अध्यक्षबीचमा कुरा मिल्न सकेको छैन ।