१३५० को प्रतिरोध तोड्न बजार आज पनि असफल, प्राविधिक विश्लेषणले के देखायो ?

३० असार, काठमाडाैं । तेश्रो कारोवार दिन शेयर बजारमा सामान्य अंकको मात्र वृद्धि देखिएको छ । मंगलबार नेप्से परिसूचक ५ दशमलव ०४ अंकले वृद्धि हुँदै १३४७ दशमवल ४४ को विन्दुमा बन्द भएको छ । दोश्रो बजार शुन्य दशमलव ३८ प्रतिशतले वृद्धि हुँदा ९९ करोड ४५ लाख माथिको शेयर कारोवार भएको हाे । आज १८६ कम्पनीका २५ लाख ६८ हजार कित्ता शेयर खरिद बिक्री भएका छन् ।

आज सुरुवाती पहिलो घण्टामा बजारले उचाई समातेको थियो । आज १२ बजेर १४ मिनेट जाँदा बजारले १३४९ दशमलव २५ को उच्च विन्दु समातेको थियो त्यसपछि भने घटेको बजारले १ बजेर १६ मिनेट जाँदा १३४० दशमलव ६७ को न्यून विन्दु समातेको थियो । त्यसपछि भने बजार माथिल्लो दिशातर्फ लाग्दै १३४७ दशमलव ४५ को विन्दुमा बन्द भएको छ । आज पनि बजारको उच्च विन्दु १३५० को क्षेत्रमा रहेकोमा यो क्षेत्र निकै दिन देखि प्रतिरोध क्षेत्रको रुपमा रहेको छ ।

आज वाणिज्य बैंक, होटल, हाईड्रोपावर, लघुवित्त र म्युचअल फण्ड उपसुचकमा मात्र वृद्धि देखिएको छ भने अरु सबै उपसुचकमा गिरावट आएको छ । आज होटल उपसुचकमा सर्वाधिक ३ दशमलव ७९ प्रतिशतको वृद्धि देखिएको छ भने लघुवित्त उपसुचकमा पनि राम्रै वृद्धि देखिएको छ।

नेपाल पुनर्बीमा कम्पनीको सर्वाधिक ११ करोड १० लाख बराबरको शेयर खरिद बिक्री हुँदा दोश्रोमा एनएमबी बैंकको ६ करोड ८६ लाख बराबरको शेयर खरिद बिक्री भएको छ।

प्राविधिक बिश्लेषण :
आज पनि बजारमा उतारचढाब कम रहेको छ। आजको मैनबत्तीले “डोजी” आकृती बनाएको छ। यसले बजारमा क्रेता र विक्रेताको चाप बराबर रहेको र बजारले निश्चित दिशा तय गरेको देखिदैन । बजार हाल १३६२ को प्रतिरोध क्षेत्र नजिक रहेको छ। दैनिकी अवधिमा “आरएसआई” ५२ दशमलब ९५ को बिन्दुमा छ। यो अक्सिलेटरले बजार हालसम्म सकारात्मक रहेको जानकारी दिएको छ ।

“एडिएक्स” र जोड / बिजोड “डाइरेक्सनल इन्डेक्स”हरुले बजारमा क्रेता र विक्रेताको चाप बराबर रहेको जानकारी गराएको छ। “अन ब्यालेन्स भल्यूम” ले बजारमा क्रेताको चाप हुन थालेको जानकारी गराएको छ । नेप्से बढेमा पहिलो प्रतिरोध १३६२ को क्षेत्रमा पाउने देखिन्छ र घटेमा पहिलो टेवा १३३३ को क्षेत्रमा पाउने देखिन्छ।