चीनबाट लिएको ५५ लाख अमेरिकी डलर प्रधानमन्त्री ओलीले स्वीस बैंकमा राखेको दावी

काठमाडौं । प्रधानमन्त्री केपी शर्मा ओलीले स्वीस बैंकमा पैसा राखेको पाइएको छ । स्विट्जरल्यान्डस्थित स्वीस बैंक खातामा प्रधानमन्त्री ओलीले झण्डै ५५ लाख अमेरिकी डलर जम्मा गरेको एक प्रतिवेदन सार्वजनिक भएको हाे ।

ग्लोबल वाच एनलाइसीसले सार्वजनिक गरेको प्रतिवेदनअनुसार ओली पहिलो पटक प्रधानमन्त्री भएकै बेला उनले यो रकम स्वीस बैंकमा जम्मा गरेका हुन् । त्यो रकम चीनले दिएको पनि प्रतिवेदनमा उल्लेख छ । जेनेभामा रहेको मिराबाउड बैंकको शाखामा ओलीको नाममा ५५ लाख अमेरिकी डलर छ । त्यसबाट ओली र उनकी पत्नी राधिका शाक्यलाई बर्षेनी ५ लाख अमेरिकी डलर आउने गरेको प्रतिवेदनमा भनिएको छ ।

२०७२ सालमा पहिलोपटक प्रधानमन्त्री भएका बेला ओलीले चीनबाट यो रकम पाएको पनि प्रतिवेदनमा दाबी गरिएको छ । तत्कालीन नेपालका लागि चिनियाँ राजदूत उ चुन्ताइले ओलीलाई कम्बोडियाको टेलिकम्युनिकेशन क्षेत्रमा लगानी गर्न यो रकम दिएका हुन् ।

यो रकम ओलीका नाममा भित्र्याउन र कम्बोडियाको कम्पनीमा लगानी गर्न यति हाेल्डिन्स्का व्यापारी आङछिरिङ शेर्पाले भूमिका खेलेका थिए । शेर्पाको दुई बर्षअघि ताप्लेजुङमा भएको हेलिकोप्टर दुर्घटनामा पर्यटनमन्त्री रवीन्द्र अधिकारीसँगै मृत्यु भएको थियो । कम्बोडियाका प्रधानमन्त्री हुन सेन र चिनियाँ राजदूत बो जिआङेओको सहयोगमा ओलीले त्यहाँ लगानी गरेको पनि उक्त प्रतिवेदनमा दावी गरिएकाे छ । कसैको पनि आधिकारिक भनाई, फोटो र प्रमाण नराखिएको प्रतिवेदनमा चीनले नै ओलीलाई त्यो रकम दिएको दावी गरेकाे छ ।

खासगरी आफूभन्दा साना देशलाई भ्रष्ट बनाउन त्यो रकम दिइएको पनि ग्लोबल वाच एनालाइसीसको प्रतिवेदनमा उल्लेख छ । यसको पछिल्लो प्रमाणका रुपमा सिंहदरबारस्थित प्रधानमन्त्री कार्यालयमा निर्माण गरिएको एक्सन रुम तयार पार्न चिनियाँ कम्पनी हुवावेले जिम्मा पाएको उक्त प्रतिवेदनले तर्क गरेकाे छ ।

त्यो चिनियाँ ‘कनेक्सन’ भएको पनि प्रतिवेदनमा उल्लेख छ । चिनियाँ नेताहरुसँग स्वर्गीय व्यापारी आङछिरिङ शेर्पा, प्रधानमन्त्रीका प्रेस सल्लाहकार विष्णु रिमाल लगायतको विशेष सम्बन्ध रहेको दाबी प्रतिवेदनमा छ । चिनिया नेतामार्फत अहिले रिमाल लगायतका व्यक्तिहरुको नेक्ससबाट ओलीलाई पैसा आउने गरेको दाबी गरिएको छ ।

ग्लोबल वाच एनालाईसीसले पछिल्लो समय चीनबाट खरिद गरिएको स्वास्थ्य सामग्रीमा भएको अनियमितताबारे पनि अनुसन्धान गरिरहेको बताएको छ । खासगरी भारतीय नेताहरुबाट प्रधानमन्त्री ओलीलाई चीनसँग जोडेर टिकाटिप्पणी भइरहेका बेला यो प्रतिवेदनले अर्को तरंग ल्याएको छ । यसबारे प्रधानमन्त्री ओली र उनको सचिवालयले कुनै आधिकारिक भनाई सार्वजनिक गरेको छैन ।

स्रोत : ग्लोबल वाच एनालाईसीस