पूर्व गभर्नर डा. तिलक रावलले पाए भ्रष्ट्राचार आरोपबाट सफाई

३० असार, काठमाडौं । प्लाष्टिक अर्थात पोलिमर नोट छपाईमा भ्रष्ट्राचार आरोप लागेका नेपाल राष्ट्र बैंकका पूर्वगभर्नर डा. तिलक रावलसहित तिनै जनालाई विशेष अदालतले सफाई दिएको छ ।

अख्तियार दुरुपयोग अनुसन्धान आयोगले डा. रावल, नेपाल राष्ट्र बैंकका तत्कालिन नोट विभाग प्रमुख उपेन्द्रकेशरी पौड्याल र स्थानीय प्रतिनिधि हिमालयबहादुर पाँडे विरुद्ध भ्रष्ट्राचार मुद्दा दायर गरेको थियो ।

२०७५ पुसमा दायर गरिएको भ्रष्ट्राचार मुद्दामा दुई बर्षपछि विशेष अदालतले सफाई दिएको हो । विशेष अदालतका अध्यक्ष शिवराज अधिकारी र सदस्यद्वय बालेन्द्र रुपाखेती र शान्तिसिंह थापाको संयुक्त इजलाशले मंगलबार तीनै जनालाई सफाई दिने फैसला गरेको हो ।

बैंकले १० रुपैयाँ दरका पाँच करोड थान पोलिमर नोट छाप्दा गुणस्तर कायम नगरेको, अस्ट्रेलियाको स्थानीय एजेन्टमार्फत आर्थिक लेनदेन गरेको, गैरकानुनी मिलेमतो गरी भ्रष्टाचार गरेको अख्तियारको दाबी थियो । अख्तियारले उनीहरूसँग ९१ लाख रुपैयाँ बिगो माग दाबी गरेपनि विशेष अदालतले भने सफाई दिएको हो ।