नसम्हालिएका केपी ओली शिथिल !

काठमाडौं । प्रधानमन्त्रीसमेत रहेका नेपाल कम्युनिष्ट पार्टी अध्यक्ष केपी शर्मा ओली पछिल्ला दिन अलि शिथिल छन् । वातै पिच्छे विवादमा तानिन थालेपछि ओलीको बोली मत्थर भएको छ । भानु जयन्तीको अवसरमा उनले मर्यादापुरुषोत्तम श्रीराम जन्मभूभि अयोध्याका बारे उनको विवादास्पद अभिव्यक्तिले ठूलै हंगामा मच्चायो ।

भारतीय पक्षले मात्र नभई नेपालमा समेत ओलीको बोली बेलगाम भएको भन्दै धेरैले आलोचना गरे । उनकै पार्टीबाट समेत चर्काे विरोध भयो । उपाध्यक्ष बामदेव गौतमले बेमौसमी बाजा बजाउने ओलीले भारतीय जनतासँग माफी नै माग्नुपर्ने बताए ।

यस भन्दा अगाडि पनि ओलीले नेपालको नयाँ नक्शा जारी गरेकाले भारत आफूसँग क्रुद्ध रहेकाले प्रधानमन्त्री पदबाट हटाउन खोजेको अभिव्यक्ति दिएका थिए । साथै, आफूलाई हटाउन पार्टी भित्रकै केही साथीहरु भारतको गोटी बनेको आरोपसमेत लगाएका थिए ।

उक्त बोलीले गर्दा पार्टी भित्र ओलीको ठूलो विरोध भएको थियो । सो घटना सेलाउन नपाउँदै फेरि बिना तथ्य प्रमाण रामचन्द्रको जन्मभूमि नेपालकै अयोध्यापुरी रहेको अभिव्यक्ति दिए । यहाँसम्म आइपुग्दा ओलीको मनोदशा शिथिल भइसकेको छ । हिजो अर्का अध्यक्ष पुष्पकमल दाहाल प्रचण्डलाई वार्ताका लागि बोलाएपनि उनले खुलेर कुरा गर्न सकेनन् । ओलीको निराशा र हतास मनस्थिति देखेर प्रचण्ड पछि कुरा गरौंंला भन्दै बालुवाटारबाट निस्किएका थिए ।

लगत्तै परराष्ट्र मन्त्रालयले विज्ञप्ति नै जारी गर्नुप¥यो । नेपाल र भारतबीचको सांस्कृतिक सम्बन्धमा खलल पार्ने उद्धेश्य नभएको भन्दै ओलीका तर्फबाट गलत भएको स्वीकार गरेको छ ।  आफ्नो बोली जताततै विवादमा पर्न थालेपछि हिजो साँझ उनले निकटस्थहरुसँग लामै छलफल गरको स्रोतले बताएको छ ।

ओलीका निकटस्थहरुले पनि थरि थरिका सुझाव दिने गरेका छन् । ओलीका निटस्थहरुमा पनि तीन थरि मानिस रहेका छन् । पहिलो समूहमा ओलीसँग विगत लामो समयदेखि दुखका साथी रहेका छन् । तिनमा शंकर पोखरेल, प्रदीप ज्ञवाली र पृथ्वी सुब्बा गुरुङ रहेका छन् । यो समूह पार्टी एकताका लागि आवश्यक पर्दा केही त्याग गर्नसमेत तयार रहनुपर्ने पक्षमा छ । पार्टी भित्रको विवाद अन्त्य गर्न सरकारको नेतृत्व त्यागेर पार्टीको कमाण्ड सम्हाल्न उनीहरुले सुझाएका छन् ।

ओलीलाई उनीहरुको सुझाव अहिले त्यति प्रिय लागेको छैन । प्रधानमन्त्री त्याग्दा पार्टी भित्र आफूविरुद्ध अझै षडयन्त्र हुुन सक्ने उनको ठम्याई छ । त्यसैले यो समूहको सुझाव ओलीले तत्कालका लागि मानेका छैनन् । अर्का थरिमा ओलीका सल्लाहकारमा पूर्व सभामुख सुभाषचन्द्र नेम्बाङलगायत रहेका छन् । यो समूह भने ओलीले तत्काल दुबै पद त्याग्न नहुने तर व्यावहारगत रुपमा आफूलाई परिमार्जन भने गर्न पर्ने पक्षमा रहेको छ ।

ओली यो समूहको सल्लाहलाई अलि सिरियसली लिइरहेका छन् । तर असन्तुष्ट पक्षले भने कुनै एक पद त्याग्नै पर्ने अडान लिइरहेको अवस्था छ । ओलीका अर्का थरि सल्लाहकार भने हार्डलाइनर छन् । जसको नेतृत्व उपप्रधानमन्त्री इश्वर पोखरेलले गरेका छन् । उनको टिममा प्रधानमन्त्रीका प्रमुख राजनीतिक सल्लाहकार विष्णु रिमाल, गोकुल बाँस्कोटा लगायत रहेका छन् । यो समूहमा राष्ट्रपति विद्यादेवी भण्डारीको समेत परोक्ष साथ रहेको छ ।

ओलीलाई पछिल्लो अवस्थामा धेरै नै काँध थापेको यो समूह विवादास्पद छवि बनाएकाहरु बढी रहेकाले धेरै प्रभावकारी छैनन् । तर ओली यही समूहको सल्लाह बढी रुचाउने गरेका छन् । तर अयोध्या प्रकरणमा भने ओलीले पहिलो समूहकै कुरा बढी सुनेका छन् । आफूले बोल्दा बिचार गर्नुपर्ने उनीहरुको सुझाव ओलीले मनन गरेका छन् । त्यसैले अब धेरै नबोल्ने प्रण हिजोको छलफलमा उनले गरेका छन् ।

तर नेपालीमा एउटा उखान छ– तित्राको मुखै बैरी । शिकारीबाट बच्न लुक्नुपर्नेमा तित्रो कराएकै कारण मारिने गर्छ । सोही हविगत भएको छ अहिले ओलीको । उनी आदतबाट मजबुुर छन् । अरुले दिएको सुझाव मान्ने उनको आदत छैन । त्यसैले भोलिबाट ओलीले गँजेडी गफ नगर्लान् भनेर पत्याउन मुश्किल छ ।

नेपालको राजनीतिक इतिहासमा सायदै यति बलियो सरकारको नेतृत्व गर्ने अवसर पाएका थिए अरुले, जो नेकपा अध्यक्ष खड्गप्रसाद शर्मा ओली अर्थात कम्रेड केपीलाई जु¥यो । ओलीको काँधमा आएको यो ऐतिहासिक मौका अहिले नेकपाका लागि कागलाई बेल पाक्यो हर्ष न विष्मात जस्तो भएको छ ।

सबै मौका र अवसर केवल ओली मार्कालाई मात्र उपलव्ध छ । पार्टी भित्र चरम गुुटबन्दी र असन्तोष छ । पाएसम्म ओलीका अरिंगालले मात्रै हसुरेका छन् । आगामी महाधिबेशन र आम निर्वाचनमा आफ्ना पक्षका लाई जसरी भएपनि जिताउने एक मात्र ध्याउन्न ओलीको रहेको छ । त्यसैले गर्दा जतिसक्दो लुट्ने नीति बनाएका छन् ओलीले ।

कोरोना महामारीका बेलासमेत ओलीका अरिंगालले कमिसन र भ्रष्टाचार खुलेआम गरे । ओम्नी समूह होस् वा यति होल्डिङ यी ओलीका मितेरी साइनो नै गाँसेका व्यावसायिक समूह बने । यिनीहरुमार्फत अर्बाै रुपियाँको अनियमितता र भ्रष्टाचार ओलीको संरक्षणमा भए । त्यो नेपाल र नेपालीका निम्ति सबैभन्दा लज्जाको सन्दर्भ बन्यो ।

सबै विषयको ज्ञाता आफैं हुँ भन्ने भ्रमपूर्ण दम्भबाट ओली ग्रस्त छन् । त्यसैले जथाभावी बोल्दै छन्– राजनीतिक विश्लेषक पुुरञ्जन आचार्यले भनेका छन् । अल्प ज्ञान भयंकरम् भनेको यस्तै सनकी शासकमा हुने उनको ठम्याई छ । नेपाल र नेपाली जनताका अभिभावकका रुपमा रहेका प्रधानमन्त्रीकै यस्तो अभिव्यक्तिले समुचा विश्व ब्रम्हाण्डमा नेपालीको शीर निहुरिएको छ । सदियौंदेखिको स्थापित मान्यताको धज्जी उडाउने काम ओलीले गरेका छन् ।

जसको अर्थ भनेको उनी भारतसँग कुनै पनि हातलमा सहज सम्बन्ध बनाउन इच्छुक छैनन् भन्ने नै हो । भारतले अतिक्रमण गरेको नेपाली भूमि फिर्ता गर्न जसरी भएपनि वार्ता र सम्बाद नै आवश्यक छ । तर ओलीका अभिव्यक्तिले त्यो सम्भावना पछाडि धकेलिंदै गएको छ । यसले कालान्तरमा नेपाललाई नै घाटा पुग्ने हो ।