भोलिदेखि अनलाईन पठनपाठन बन्द गर्ने निजी विद्यालय सञ्चालकको निर्णय

काठमाडौं । निजी विद्यालय सञ्चालकहरुले अनलाइन कक्षा बन्द गर्ने घोषणा गरेका छन । प्याब्सन, एनप्याब्सनले भोलि बिहीबारदेखि देशभर अनलाइन र दूरशिक्षाको पठनपाठन रोक्ने निर्णय गरेका हुन ।

सरकारले साउन १ गतेदेखि स्कुलमा पठनपाठन गराउने तयारी गरेको छ । तर निजी विद्यालयले भने त्यसको विरोधमा विद्यालय बन्द गरेको घोषणा गरेका छन । विद्यालय सञ्चालन गर्न आर्थिक र व्यवसायिक संकट परेको कारण साउन १ गतेदेखि शिक्षण सिकाई क्रियाकलाप बन्द गरिएको प्याब्सन, एनप्याब्सनले जनाएका छन ।

बुधबार संयुक्त विज्ञप्ती जारी गर्दै शिक्षक, कर्मचारीलाई समेत बेतलबी घर बिदामा राख्ने निर्णय गरिएको प्याब्सन र एनप्याब्सनको भनाई छ । सरकारकै योजनाअनुसार निजी विद्यालयहरुले पनि अनलाइन, रेडियो र टेलिभिजनका माध्यमबाट असार १ गतेदेखि वैकिल्पक कक्षा सञ्चालन गर्दै आएका भएपनि त्यो प्रभावकारी थिएन ।

त्यसबेला देखि नै आफूले शुल्क असुल्न पाउनुपर्ने माग गर्दै आएका उनीहरु सरकारसँग विभिन्न माग राख्दै आन्दोलन गर्ने चेतावनी दिदै आइरहेका थिए । तर सरकारले समन्वय गरेर त्यो चेतावनी बेवास्ता गर्दै आएका थियो । यसअघि गएको हप्ता पनि उनीहरुले यस्तै चेतावनीपूर्ण सन्देश दिएका थिए । पछि मन्त्रालयसँगको वार्ता सकारात्मक भएपछि त्यो निर्णय फिर्ता लिएका थिए । तर यसपटक भने अनलाईन कक्षा बन्द गर्ने निर्णय गरेका छन ।