लकडाउनबाट अतिप्रभावित परिवारलाई खाद्यान्न वितरण

◊ धिरुभाई

सप्तरी । युकेएडको आर्थिक सहयोग भीएसओ नेपालसँगको साझेदारी सप्तरीको बोदे बर्साईन वडा नम्बर – ५ समन्वयमा समग्र जनउत्थान केन्द्र लहान-६ सिरहाले कोरोना भाइरस संक्रमण फैलिन नदिन जारी लकडाउन ‘बन्दाबन्दी’बाट अतिप्रभावित अपाङ्गता ‘फरक क्षमता भएका’ तथा विपन्न सीमान्तकृत परिवारलाई मंगलबार राहत स्वरुप खाद्यान्न प्रदान गरेको छ ।

सप्तरीको बोदे बर्साईन नगरपालिका वार्ड नम्बर-५ रा.प्रा.वि भाटिनमा रातो कार्डधारी अपाङ्गता र विपन्न सीमान्तकृत गरी ४६ परिवारलाई खाद्यान्न राहत प्रदान गरेको समग्र जन उत्थान केन्द्रका कार्यक्रम अधिकृत रामभरोसी महतोले बताए ।

उक्त खाद्य सामग्री वितरण कार्यक्रममा बोदे बर्साईन नगरपालिका वडा नम्बर- ५ वडा अध्यक्ष मो. मजिवुर रहमान , भीएसओ नेपालका सुनिल कुमार साह, समग्र जन-उत्थानका कार्यक्रम अधिकृत अकवर अन्सारी , समाजिक परिचालक लोकेन्द्र प्रसाद यादव , मनोविमर्शकर्ता कवित चौधरी लगायतको उपस्थिति थियो ।

बोदे बर्साईन नगरपालिका वडा नम्बर – ५ मा २६ अपाङ्गता र २० विपन्न गरि जम्मा ४६ परिवारलाई खाद्य सामग्री सहयोग कार्यक्रम अन्तर्गत राहत वितरण गरेको कार्यकारी निर्देशक देवराज पोखरेलले बताए । कोभिड–१९ का कारण जारी लकडाउनबाट अतिप्रभावित दैनिक ज्यालादारी गरी खाने ती परिवारलाई जनसमग्र उत्थान केन्द्रले प्रति परिवार ३० किलो चामल, तीन किलो दाल, दुई किलो नून, दुई लिटर खानेतेल, दुई किलो चिनी र चार वटा साबुन प्रदान गरेको छ ।