बालुवाटारमा ओली गुटको भेला !

१ साउन, काठमाडौं । नेकपाका अध्यक्ष प्रचण्ड र बरिष्ठ नेता माधव कुमार नेपालले दोहो¥याएर राजीनामा दिन दवाव दिएपछि प्रधानमन्त्री केपी शर्मा ओलीले बालुवाटारमा आफुनिकटका नेताहरुको भेला गरेका छन । कसैगरी पनि प्रचण्ड र माधव नेपालले राजीनामा माग नछाडेपछि फेरि तनावमा देखिएका ओलीले आफूनिकटका नेताहरुसँग परामर्श थालेका हुन ।

झण्डै एकहप्तासम्म पनि प्रचण्ड र माधव नेपाल पक्षसँगको वार्ता निष्कर्षमा नपुगेपछि ओलीले आफू निकटकका नेता, मन्त्री र सल्लाहकारहरुसँग छलफल थालेका नेताहरुले बताएका छन । ओलीको बोलावटपछि रक्षामन्त्री ईश्वर पोखरेल, महासचिव विष्णु पौडेल, संसदीय दलका उपेनता सुवास नेम्वाङ बालुवाटार पुगेका छन । यस्तै ओली पक्षका अरु नेता तथा मन्त्रीहरु पनि बालुवाटारमै छन ।

दिउँसो नै माधव नेपाल र प्रचण्डसँगको संयुक्त वार्ता निष्कर्षमा नपुगेपछि ओलीले आफुनिकटका नेताहरुलाई बालुवाटार बोलाएका हुन । दिउँसो भएको वार्तामा प्रचण्ड र माधव नेपालले तत्काल राजीनामा दिन ओलीलाई दवाव दिएका थिए ।

स्थायी कमिटी बैठकमा ओली अल्पमतमा छन भने बहुमत सदस्यले औपचारिक रुपमै ओलीको राजीनामा माग गरिसकेका छन । स्थायी कमिटी बैठकको राजीनामा दवाव थेग्न नसकेर ओलीले बैठक नै स्थगित गदैै आएका छन । भोलि बस्ने बैठक पनि बस्न नबस्ने टुंगो छैन ।

तर प्रचण्ड र माधव नेपालले बैठक नरोकिने बताएका छन । भोलिको स्थायी कमिटी बैठक, प्रचण्ड र माधव नेपालसँगको अन्तिम सहमतिको बिन्दु अब चाल्नुपर्ने कदमका विषयमा प्रधानमन्त्री ओलीले आफ्नो गुटका नेताहरुसँग छलफल थालेका हुन ।