तत्काल केन्द्रिय कमिटी बैठक बोलाउने प्रचण्ड-माधव नेपाल पक्षको निर्णय

१ असार, काठमाडौं । सत्तारुढ नेपाल कम्युनिस्ट पार्टी नेकपाका बहु्मत नेताहरुले तत्काल केन्द्रीय कमिटीको बैठक बोलाउन माग गरेका छन । नेकपाका अध्यक्ष प्रचण्डको निवास खुमलटारमा बसेको भेलाले तत्काल केन्द्रिय कमिटी बैठक बोलाउने निर्णय गरेको हो ।

यद्यपी यो अनौपचारिक निर्णय हो । स्थायी कमिटी बैठकमा प्रधानमन्त्री केपी शर्मा ओलीलाई राजीनामा दिन दबाब बढेका बेला केन्द्रिय कमिटी बैठकबाट पनि ओलीलाई एक्ल्याउने प्रचण्ड माधव नेपाल पक्षका नेताहरुको रणनीति छ ।

बिहीबार दिउँसो बालुवाटारमा ओलीसँगको वार्ता सफल नभएपछि खुमलटारमा बसेको प्रचण्ड र माधव पक्षका नेताहरुको भेलाले तत्काल केन्द्रिय कमिटी बैठक बोलाउने निर्णय गरेको हो ।

नेकपाको सचिवालयका प्रमुख नेताहरु प्रचण्ड, माधव नेपाल, झलनाथ खनाल, नारायणकाजी श्रेष्ठ, बामदेव गौतम लगायतका नेताहरुले तत्कालै केन्द्रिय कमिटी बैठक बोलाउनुपर्ने निष्कर्ष निकालेका हुन । खुमलटार भेलामा गृहमन्त्री रामबहादुर थापा बादल पनि सहभागि रहेको नेताहरुले बताएका छन ।

भोलिको स्थायी कमिटी बैठकमा ओली नआएपनि बहुमतका आधारमा केन्द्रिय कमिटी बैठकको मिति तय गर्ने नेताहरुको भनाई छ । यसले नेकपाभित्रको आन्तरिक संघर्ष फेरि उत्कर्षमा पुगेको छ भने ओलीको सत्ता सकंट थप गहिरिएको छ ।