दलित विद्यार्थीलाई युवानेता भण्डारीको साथ सहयोग

१ साउन, धनगढी । नेपाली कांग्रेसका युवा नेता क्षितिज भण्डारीले नेपाल दलित विद्यार्थी संघको धनगढी उपमहानगरपालिका समितिलाई स्वास्थ सुरक्षा सामग्री हस्तान्तरण वितरण गरेका छन । काठमाडौंदेखि कैलालीसम्म कुनै चन्दा नउठाई राहत बाड्दै आएका भण्डारीले बिहीबार धनगढीको दलित विद्यार्थीहरुलाई स्वास्थ्य सुरक्षा सामग्री वितरण गरेका हुन् ।

हरिप्रिया प्रकश फाउण्डेसनको तर्फबाट नेता भण्डारीले पीपीई, फेस सिल्ड, मास्क, स्यानिटाइजर वितरण गरेका हुन । स्वास्थ्य सुरक्षा सामग्री बालिका आराध्या भण्डारी र क्यारोलिन भण्डारीको हातबाट हस्तान्तरण गरिएको थियो ।

सामग्री हस्तान्तरण कार्यक्रममा दलितमाथि भइरहेको जातीय विभेद, अपराध र रुकुम सोतीमा भएको जातीय नरसंहारका विषयमा समेत परामर्श भएको थियो ।

धनगढी उपमहानगरपालिकाका मेयर नृप वडमाथि जातीय भेदभाव आशयसहित गाली बेइज्जती भएको विषयमा कांग्रेस युवा नेता भण्डारी र दलित विद्यार्थीहरुबीच गम्भिर छलफल भएको थियो । जातीय विभेद अन्त्यका लागि आफूले सक्दो सहयोग गर्ने पनि उनले बताए ।

विद्यार्थीको प्रश्नको जवाफ दिदै युवानेता भण्डारीले सुदुरपश्चिम र देशभरी जातीय विभेद र उत्पीडन अन्त्य गर्न अब स्कुलदेखि क्याम्पससम्मको पाठयक्रममा सचेतना फैलाउने विषयवस्तु समेटिनुपर्ने बताए ।

साथै सामाजिक सद्भाव बढाउदै दलित अधिकार र आत्मसम्मानको रक्षाको लागि युवानेता भण्डारीले प्रतिबद्धता जनाएका छन् । कोरोना महामारी र लकडाउनमा अरुको सेवामा सक्रिय तपेन्द्र भुसाल र दिपक विश्वकर्मालाई पीपीई र फेससिल्डसहित सम्मान गरिएको थियो ।