नेकपाको स्थायी कमिटी बैठक फेरि पर्सीसम्मका लागि स्थगित

२ साउन, काठमाडौं । सत्तारुढ नेपाल कम्युनिष्ट पार्टी नेकपाको स्थायी कमिटी बैठक पर्सीसम्मका लागि स्थगित भएको छ । आज बिहान बस्ने बैठक दिउँसो ३ बजेसम्मका लागि स्थगित भएको थियो ।

तर दुई अध्यक्ष केपी शर्मा ओली र प्रचण्डबीच कुरा नमिलेपछि बैठक पर्सी साउन ४ गते दिउँसो ३ बजेसम्मका लागि स्थगित भएको प्रधानमन्त्रीका प्रेस सल्लाहकार सुर्य थापाले जानकारी दिए ।

नेकपाभित्र प्रधानमन्त्री ओलीको कार्यशैलीलाई लिएर तिब्र विवाद छ । खासगरी एकलौटी रुपमा पार्टी र सरकार चलाएको अनि कसैसँग पनि परामर्श नगरेको आरोप ओलीमाथि शुरुदेखि लागेको थियो ।

पटक पटक सच्चिन आग्रह गरेपनि ओलीले त्यसलाई बेवास्ता गर्दै झन पेल्न खोजेपछि यसपटक अवस्था जटिल बनेको छ । शुक्रबार बिहान पनि अध्यक्ष प्रचण्ड र ओलीबीच कुराकानी भएको थियो ।

तर कुरा सहमतिभन्दा आ आफ्नो अडानमा रुमल्लिएपछि स्थायी कमिटी बैठक फेरि दुई दिन पर सारिएको हो । यसअघि हिजो प्रधानमन्त्री ओली, नेकपाका अध्यक्ष प्रचण्ड र बरिष्ठ नेता माधवकुमार नेपालबीच छलफल भएको थियो ।

प्रचण्ड र नेपालले दोहो¥याएर प्रधानमन्त्री ओलीलाई तत्काल राजीनामा दिन भनेपछि संकट झन् गहिरिएको थियो । शुक्रबार बिहानसम्म पनि संकट समाधान हुनेभन्दा झन गहिरिएपछि अन्ततः स्थायी कमिटी बैठक स्थगित हुन पुगेको छ ।

नेकपाभित्र सत्ता लोभले प्रचण्ड र माधव नेपाल जसरी पनि ओलीलाई प्रधानमन्त्री पदबाट राजीनामा गराउन चाहन्छन । तर ओली बरु पार्टी फुटाउने तर राजीनामा नगर्ने अडानमा छन् । सोही कारण सत्तारुढ नेकपाभित्र विवाद झन बल्झिएको छ ।