कार्यकक्षमै गाउँपालिका अध्यक्षमाथि खुकुरी प्रहार

२ साउन, विराटनगर । मोरङ केराबारी गाउँपालिकाका अध्यक्षमाथि खुकुरी प्रहार भएको छ। शुक्रबार गाउँपालिका कार्यालयमै करको विषयमा विवाद हुँदा गाउँपालिका अध्यक्ष रोहित कार्कीमाथि खुकुरी प्रहार भएको हो ।

मोरङका डीएसपी मानबहादुर राईका अनुसार खुकुरी प्रहार गर्ने स्थानीय भवन ठकुरीलाई प्रहरीले नियन्त्रणमा लिएको छ। घाइते अध्यक्ष कार्कीलाई उपचारका लागि नोबेल अस्पताल विराटनगरतर्फ लगिएको डीएसपी राईले बताए। गाउँपालिकाको पटके करको ठेक्का नदिएको निउँमा ठकुरीले अध्यक्षमाथि खुकुरी प्रहार गरेका हुन्।

घटनाका विषयमा थप अनुसन्धान भइरहेको प्रहरीले जनाएको छ ।