सहमति खोज्ने सहमति गर्दै सकियो सचिवालय बैठक

३ साउन, काठमाडौं । सत्तारुढ नेपाल कम्युनिस्ट पार्टी ‘नेकपा’को शनिबार बसेको सचिवालय बैठक सहमति खोज्ने सहमति गर्दै सकिएको छ । आज बसेको सचिवालय बैठकमा दुई पक्षीय र बहुपक्षीयबीच छलफल भएपछि शीर्ष नेताहरुबीच सहमतिकै आधारमा अघि बढ्ने सहमति भएको छ । बैठक करिब साढे ४ घण्टासम्म बसेको थियो ।

सचिवालय बैठकअघि नेकपाका दुई अध्यक्ष केपी शर्मा ओली र पुष्पकमल दाहालबीच एक्लाएक्लै वार्ता भएको थियो। नेकपाभित्र शक्ति संघर्ष उच्चतम विन्दुमा पुगेका बेला पार्टी फुटकै संघारमा पुगेको छ। यद्यपि विवाद समाधानका लागि प्रयासहरु जारी छन्।

प्रधानमन्त्री निवास बालुवाटारमा बसेको बैठक सकिएलगतै प्रधानमन्त्री ओली राष्ट्रपतिलाई भेट्न शीतलनिवासतर्फ लागेका छन् ।अध्यक्ष एवं प्रधानमन्त्री ओलीसँगै अर्का अध्यक्ष प्रचण्ड पनि शीतलनिवासतर्फ लागेका छन् ।

आइतबारका लागि ३ बजे तय भएको स्थायी कमिटीको पूर्वनिर्धारित बैठक कायमै छ । भोलि ३ बजे स्थायी बैठकमा थप छलफल हुने हुने बताइएकाे छ । बैठकमा पार्टीमा देखिएको संकट समाधानका लागि भइरहेको छलफललाई जारी राख्ने सहमति भएको प्रवक्ता नारायणकाजी श्रेष्ठले सञ्चारकर्मीहरुलाई जानकारी दिए ।