नेकपाको स्थायी कमिटी बैठक आज, ओली-प्रचण्डबीच सहमति जुट्यो ?

४ साउन, काठमाडौं । सत्तारुढ नेकपाको स्थायी कमिटी बैठक आज बस्दैछ । दिउसो ३ बजे बोलाइएको स्थायी कमिटी बैठक झण्डै १५ दिनपछि बस्ने तयारीमा छ । तर मध्यान्ह नभई बैठक बस्ने नबस्ने टुंगो छैन् । यसअघि तय भएका बैठक पनि बिहान बस्ने भनिदा बैठकको मुखैमा स्थगित हुने गरेका थिए ।

हिजो शनिबार बसेको सचिवालय बैठक सकारात्मक भएकाले आजको स्थायी कमिटी बैठक बस्ने सम्भावना बढी छ । बालुवाटारमा बसेको सचिवालय बैठकपछि हिजो नै राष्ट्रपति भवन शीतल निवासमा दुई अध्यक्षबीच सहमति भएको भनिएको छ ।

यद्यपि ओली प्रचण्डबीच कुन कुन बुँदामा सहमति जुट्यो भन्ने खुलेको छैन । आगामी मंसिरमा महाधिवेशन गर्ने गरी सहमति जुटेको र ओलीले प्रचण्डलाई अध्यक्ष पदको आश्वासन दिएको नेकपानिकट नेताहरुको भनाई छ । तर यो विषयमा प्रचण्डले मुख खोलिसकेका छैनन् ।

यसअघि ओलीलाई नेकपाको अध्यक्ष र प्रधानमन्त्री पद दुबै छाड्नुपर्ने अडान राख्दै आएका प्रचण्ड एकाएक ‘कन्भिन्स’ भएको कुरा अझै पत्यारलाग्दो भने छैन । प्रचण्डलाई ओलीले पटक पटक आश्वासन दिदै फेरि धोका दिदै आएका छन् । जुन श्रृङ्खला पछिल्लो दुई बर्षयता चलिरहेको छ ।

शुरुमा आलोपालो प्रधानमन्त्री बन्ने सहमति गरेका ओली प्रचण्डबीच पछिल्लो पटक कार्यकारी अध्यक्षमा कुरा मिलेको थियो । तर दुबै सहमति कार्यान्वयन नभएपछि यसपटक प्रचण्ड ओलीसँग निकै क्रुद्ध बनेका थिए । जुन ओलीको राजीनामा माग चर्काउन कारक बन्यो ।

त्यसैले ओलीले यसपटक प्रचण्डलाई अध्यक्षको आश्वासन दिएपनि त्यो कार्यान्वयन हुनेमा शंका छ । फेरि ओली र प्रचण्डबीच गोप्य सहमति हुँदा माधव नेपाल पक्ष भने सशंकित भएको छ । यसअघि ओलीबाट पटक पटक अन्तरघात व्यहोरेका माधव नेपाल यसपटक प्रचण्डबाट पनि ‘कर्नर’मा पारिएका छन ।

आइतबारको स्थायी कमिटी बैठकमा दुई अध्यक्षबीच कुरा मिलेको देखिए नेकपाको आन्तरिक विवाद समाधान भएको ठहरिनेछ । तर यसमा माधव नेपाल पक्ष सहमत भएमा मात्रै कुरा मिल्ने नभए फेरि प्रचण्डले बखेडा झिक्न सक्ने अनुमान पनि गरिएको छ ।