खुमलटारमा प्रचण्ड-माधव पक्षको भेला

४ साउन, काठमाडौं । शनिबार राती प्रधानमन्त्री केपी शर्मा ओलीसँग भएको भनिएको सहमतिका विषयमा छलफल गर्न नेकपाका अध्यक्ष पुष्पकमल दाहाल प्रचण्ड निवास खुमलटारमा नेकपाका नेताहरुको छुट्टै भेला शुरु भएको छ ।

अध्यक्ष प्रचण्ड, बरिष्ठ नेता माधव कुमार नेपाल, झलनाथ खनाल, प्रवक्ता नारायणकाजी श्रेष्ठबीच छलफल भइरहेको छ । शनिबार सचिवालय बैठकमा ओली र प्रचण्डबीच खासै विवाद भएन ।

आगामी मंसिरमा महाधिवेशन गर्न ओली र प्रचण्डबीच सहमति भएको चर्चा छ । तर यो अर्को गोप्य सहमतिमा बरिष्ठ नेता माधव कुमार नेपाल, झलनाथ खनालले भने असन्तुष्ट जनाएका छन । ओलीसँगको सहमति, आज बस्ने स्थायी कमिटी बैठक र आगामी रणनीतिका विषयमा छलफल गर्न खुमलटारमा प्रचण्ड र माधव नेपाल पक्षबीच भेला भएको नेताहरुले बताएका छन ।

आगामी महाधिवेशनमा प्रचण्डलाई एकल अध्यक्ष बनाउन ओलीले सहयोग गर्ने सहमति भएको भनिएपनि प्रचण्डले त्यसबारे कुनै प्रतिक्रिया दिएका छैनन् । हिजो सचिवालय बैठकपछि आज दिउँसो ३ बजे नेकपाको स्थायी कमिटी बैठक बस्दै छ ।