बादल ओली गुटमा, बामदेव अन्योलमा !

४ मंसिर, काठमाडौं । नेकपाका अध्यक्ष तथा प्रधानमन्त्री केपी शर्मा ओली र अर्का अध्यक्ष प्रचण्डबीच कुरा मिल्न थालेपछि गृहमन्त्री रामबहादुर थापा बादल ओली गुटमा फर्किएका छन । सचिवालयमा ओलीकै गुटमा रहेका बादल पार्टीको निर्णायक बैठक र धारको विषय आइपर्दा भने प्रचण्ड गुटमा मिसिने गरेका छन ।

अहिलेकै अवस्थामा ओली सरकार ढल्ने नदेखिएपछि बादल फेरि पुरानै रक्षा कवचमा फर्किएका हुन् । सत्तारुढ पार्टीमा मन्त्रीको पद जोगाईराख्न प्रधानमन्त्रीकै गुटमा रहनुपर्ने प्रवृत्तिले बादल माओवादी भएर पनि ओलीको निर्देशनमा चल्ने गरेका छन ।

केही साता अघि स्थायी कमिटी बैठकमा बहमुत सदस्यले ओलीको राजीनामा माग गरेपछि ओली सरकार ढल्ने निश्चित जस्तै थियो । ओलीले बरु पार्टी फुटाउने तर प्रधानमन्त्री पदबाट नहट्ने भनेपछि प्रचण्ड र माधव नेपालको योजनाले काम गर्न सकेन् ।

ओलीले संसदको बजेट अधिवेशन अन्त्य गरिदिएपछि प्रचण्ड र माधव नेपालको त्यो सपना साकार हुन पाएन् । ओली सरकार छाड्ने अवस्थामा पुगेका बादल अचानक प्रचण्ड गुटको योजना सफल नभएपछि फेरि आफ्नो बोली फेर्दै ओली गुटमा फर्किएका हुन ।

अहिले ओली गुटमा रमाएका बादल प्रचण्ड पक्षको भेलामा खासै जादैनन् । आइतबार प्रचण्ड निवास खुमलटारमा भएको बैठकमा बादल र बामदेव गएनन् । जसले बादल अब ओली गुट सित्तिमित्ती छाड्ने पक्षमा छैनन् ।

बामदेव अन्यौलमा !

बादल ओली गुटमा फर्किएका बेला बामदेव गौतम भने अन्यौलमा छन् । प्रतिनिधिसभाको चुनाव हारेर भैसेपार्टीमा थन्किएका बामदेव अहिले प्रचण्ड, माधव नेपाल र झलनाथ गुटमा छन । आफूलाई फाइदा हुने गुटमा रमाउने बामदेव चुनाव हारेका कारण कतै पनि खुलेर काम गर्न सकेका छैनन् ।

चुनावमा हराउन ओली पक्षकै नेताहरुले चलखेल गरेका कारण उनी माधव नेपाल र झलनाथ गुटमा आएका हुन । तर त्यहाँ पनि बामदेव सन्तुष्ट छैनन् । प्रचण्ड, माधव नेपाल र झलनाथ खनाल मिलेर पनि ओली सरकार ढाल्न नसकेपछि अब बामदेवलाई यी तिनै जना नेतामाथि शंका लाग्न थालेको छ ।

प्रचण्डसँग असन्तुष्ट भएका बामदेव आइतबार भएको खुमलटार भेलामा गएनन् । यसअघि प्रधानमन्त्री केपी शर्मा ओलीले प्रधानमन्त्रीको अफर गरेपछि उनी हौसिएका थिए । तर पछि ओलीले आफूलाई गोट्टी बनाउन मात्रै प्रधानमन्त्रीको पदको आश्वासन दिएको थाहा पाएपछि बामदेव फेरि प्रचण्ड गुटमै फर्किएका थिए ।

तर प्रचण्ड पनि ओलीकै ईशारामा फनफनी घुमेको पाएपछि बामदेवको अन्योलता बढेको छ ।