ओलीसँग सहमति नभएको प्रचण्डको स्पष्टोक्ति

४ साउन, काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीसँग कुनै सहमति नभएको स्पष्ट पारेका छन । आज खुमलटारमा आफ्नो नेताहरुलाई ओलीसँग कुनै सहमति नभएको प्रचण्डले बताएका हुन् ।

ओलीसँग हिजो आगामी महाधिवेशन मंसिरमा गर्ने सहमति भएको र प्रचण्ड एकल अध्यक्ष हुने भन्दै सामाजिक सञ्जालमा हल्ला चलेको थियो । केही सञ्चारमाध्यममा समाचार आइसकेपनि प्रचण्डले भने ओलीसँग सहमति नभइसकेको बताएका हुन् ।

यद्यपी ओलीले सहमतिका लागि महाधिवेशनको प्रस्ताव गरेको प्रचण्डको भनाई छ । सचिवालय बैठकमा ओलीले महाधिवेशन मंसिरमा गर्ने र आत्मालोचना गरेर अघि बढ्नुपर्ने बताएका थिए । जसमा प्रचण्ड मौन थिए भने महासचिव विष्णु पौडेल, रक्षामन्त्री ईश्वर पोखरेल र गृहमन्त्री रामबहादुर थापा बादलले समर्थन जनाएका थिए ।

तर ओलीको प्रस्तावमा प्रचण्ड मौन देखिएपछि माधव नेपाल पक्ष भने सशंकित बनेको थियो । फेरि गोप्य सहमति गरेर आफूलाई झुक्याएको भन्दै नेपाल र अर्का बरिष्ठ नेता झलनाथ खनाल असन्तुष्ट थिए । तर आइतबार पनि स्थायी कमिटी बैठक स्थगित भएपछि ओली र प्रचण्डबीच सहमति नभएकै पुष्टि भएको छ ।