मौद्रिक नीतिले गर्दा दोश्रो बजारमा माथिल्लो सर्किट ! नयाँ लगानीकर्ताहरुले के कुरामा ध्यान दिने ?

४ श्रावण , काठमाडाैं । नेपाल राष्ट्र बैंकले शुक्रबार ल्याएको मौद्रिक नीतिले लगानीकर्ताकाे मनोबल वृद्धि गराएपछि आज शेयर बजारमा सर्किट लाग्दै ३ बजे भन्दा अघि नै बन्द भएको छ । नेप्से परिसूचक ६.०४ प्रतिशतले वृद्धि हुँदै बजार बन्द भएको हाे । नेप्से परिसूचक १४७९.०३ को विन्दुमा बन्द भएको छ । पुरै समय शेयर कारोवार हुन् नसक्दा जम्मा ६ करोड २५ लाख बराबरको शेयर किनबेच भएको छ।

आज नेपाल पुनर्बीमा कम्पनीको सर्वाधिक २ करोड ५३ लाख बराबरको शेयर खरिदबिक्री भएको छ । आज कुनै पनि कम्पनीको शेयर मूल्यमा गिरावट आएको छैन् । बजारलाई मुख्य ड्राईभ गर्ने वाणिज्य बैंकको उपसुचकमा सर्वाधिक ७ प्रतिशत भन्दा माथिको वृद्धि देखिएको छ।

किन बढ्यो लगानीकर्ताको मनोबल ?
शेयर बजारलाई चाहिने मौद्रिक नीति आउँदा लगानीकर्ताको मनोबल बढेको हाे । बैंक तथा वित्तीय संस्थाले शेयरधनीलाई दिन मिल्ने नाफाको ३० प्रतिशत भन्दा धेरै नगद लाभांश दिन नमिल्ने नियम आएकोमा अब बोनस शेयर प्रेमी नेपाली लगानीकर्ताहरु खुशी भएका छन् ।

सीसीडी बढाएर ८५ प्रतिशत पुर्याईएको छ, यसले व्याज घट्ने देखिन्छ र अर्को महत्वपूर्ण कुरा शेयर धितो कर्जाको सीमा बढाएर ७० प्रतिशत पुर्याइएको छ।

तर शेयर बजारमा साना तथा नयाँ लगानीकर्ताहरुले भने बजारमा यस्तो बेला केही सजक भएर लगानी गर्नुपर्छ । शेयर भनेको बढेपछि सधै बढ्ने जस्तो लाग्छ र घटेपछि सधै घटने जस्तो लाग्नु स्वाभविक हो। त्यसैले धेरै कुराहरु सकारात्मक हुँदा हुँदै पनि लगानीकर्ताले निम्न कुरामा ध्यान दिंदै अघि बढ्नु पर्ने हुन्छ :-

१. अब चौथो त्रैमासको वित्तीय विवरण आउँदै छ । चौथो त्रैमासको वित्तीय विवरणले कम्पनीले दिन सक्ने लाभांशको अनुमान लगाउन सहयोग पुग्छ । झन् अहिले बैंक तथा वित्तीय संस्थालेहरुले नयाँ लेखा व्यवस्था अनुसार वितरण योग्य मुनाफा पनि प्रकाशन गर्ने गर्छन । शेयर बजारमा चल्ने भनेको कम्पनीको आधारभुत कुराले हो । त्यही भएर कम्पनीको वित्तीय विवरण अध्यायन गरेर लगानी गर्नु होला ।

२. शेयर बजार वृद्धि हुँदा राम्रा नराम्रो दुवै कम्पनी वृद्धि हुन्छन, र घट्न थाल्दा राम्रा थोरै घट्छन र नराम्रा धेरै घट्छन, यस्तो बेलामा आधारभूत रुपमा बलिया कम्पनीहरु किन्दै जानु पर्छ।

३. पोर्टफोलियो व्यवस्थापन गर्दै जानुपर्ने हुन्छ । एउटै कम्पनी वा क्षेत्रमा मात्र लगानी गर्दा जोखिम वृद्धि हुने गर्छ ।

४.  यस्तो बेला शेयर बजार जस्तो हिरा केही देखिदैन् ।  धेरै लगानीकर्ताहरु आफ्नो जोखिम भन्दा बाहिर गएर कर्जा लिइ शेयर बजारमा लगानी गर्ने गर्छन । जसको कारणले गर्दा कुनै दिन बजार घट्न थाल्दा अप्ठेरो अवस्था आउँछ। त्यसैले जोखिम र आफ्नो अवस्था हेरेर लगानी गर्नुपर्छ। साथीभाईले शेयर बजारबाट कमाईसके म चाही छुटे भन्ने विचार लिएर अघि बढ्दा दुर्घटना हुन् सक्छ।