चिनियाँ जहाज उड्न नसक्दा २ अर्ब घाटा

४ साउन, काठमाडौं । नेपाल एयरलाइन्सले १५ साउनपछि चिनियाँ जहाज नउडाउने भएको छ । चिनिया जहाजबाट कम्पनीले कुनै पनि व्यवसायिक लाभ लिन नसकेको भन्दै सरकारले चिनियाँ जहाज नउडाउने भएको हो ।

चीनबाट २ वटा जहाज अनुदान र ४ वटा जहाज सहुलियतपूर्ण ऋण सहायतामा यी जहाज नेपाल ल्याइएका हुन । त्यसमध्ये १७ सीट क्षमताका ४ वटा वाइ १२ ई र ५६ सीट क्षमताका एमए ६० दुई वटा जहाज नेपाल वायुसेवा निगमसँग छन ।

यी जहाजको बिक्रीपछिको सेवा उपलब्ध हुन नसकेको, चीनबाहेक अन्य मुलुकमा जहाज मर्मत केन्द्र नभएको र नेपालमा भौगोलिक कारणले समेत चिनियाँ जहाजको प्रदर्शन सन्तोषजनक नभएको निष्कर्षमा नेपाल एयरलाइन्स पुगेको हो ।

नेपाल एयरलाइन्सले ६ वटा चिनियाँ जहाज नेपाल एयरलाइन्सको स्वामित्वमा नरही नेपाल सरकारको स्वामित्वमा रहेका कारण आफैं व्यवस्थापन गर्न समेत सुझाव दिएको छ ।

ती सदस्यका अनुसार नेपाल एयरलाइन्सलाई सरकारले उपलब्ध गराएका कारण आर्थिक जोखिम मोलैरै चलाएको भएपनि ती जहाजको स्वामित्व नेपाल सरकारकै नाममा रहन्छ ।

सोहीअनुसार नेपाल एयरलाइन्सले पटकपटक यी जहाजलाई उद्धार वा अन्य प्रयोजनमा प्रयोग गर्न सरकारलाई सुझाव दिएको छ । यी जहाज नेपाल सरकारले ६ अर्ब रुपैयाँ लगानी गरेर ल्याएको हो ।

तीमध्ये चार वटा जहाज चल्न नसक्ने अवस्थामा छन । एउटा जहाज बिग्रेकै छ भने एउटा जहाज मात्रै उडाइएको छ । ६ अर्बमा किनिएका जहाज उड्न नसक्दा २ अर्ब नोक्सनी भएको निगमले जनाएको छ ।