होलसेल लघुवित्त फर्स्ट माईक्रो फाईनान्सको व्यापार घट्याे, मुनाफा र कर्जा प्रवाह सुस्त

५ साउन, काठमाडौं । होलसेल लघुवित्त मध्येको एक फर्स्ट माईक्रो फाईनान्स आर्थिक वर्ष ०७६/७७ को चौथो त्रैमासको वित्तीय विवरण सार्वजनिक गर्ने पहिलो कम्पनी बनेको छ । यस अघि पनि त्रैमासिक प्रतिवेदनमा फर्स्ट माईक्रो फाईनान्सको नाम सुरुमा आउने गर्थ्यो ।

लघुवित्तले आर्थिक वर्ष ०७६/७७ को चौथो त्रैमाससम्ममा १३ करोड ९७ लाख खुद मुनाफा आर्जन गरेको छ । आर्थिक वर्ष ०७५/७६ मा कम्पनीले १३ करोड २४ लाख खुद मुनाफा गरेको थियो । यसरी खुद मुनाफामा सामान्य ५ प्रतिशतको वृद्धि देखिएको छ ।

८० करोड चुक्ता पुँजी भएको यस लघुवित्तको ५१ प्रतिशत हिस्सा संस्थापक शेयरधनीको रहेको छ भने ४९ प्रतिशत हिस्सा साधारण शेयरधनीको रहेको छ। कम्पनीका ठूला शेयरधनीमा ग्लोबल आईएमई बैंक र प्रभु बैंक रहेका छन्। प्रभु बैंक र ग्लोबल आईएमई बैंकको समान १५ -१५ प्रतिशत शेयर स्वामित्व रहेको छ।

कम्पनीको आर्थिक वर्ष ०७६/७७ को चौथो त्रैमास र आर्थिक वर्ष ०७५/७६ को चौथो त्रैमासलाई दाँजेर हेर्दा :

खुद ब्याज आम्दानीमा सामान्य वृद्धि :
लघुवित्तको प्रमुख आम्दानीको श्रोतकाे रूपमा रहेको खुद ब्याज आम्दानीमा सामान्य वृद्धि देखिएको छ । लघुवित्तले आर्थिक वर्ष ०७६/७७ को चौथो त्रैमासमा २२ करोड ४१ लाख खुद व्याज आम्दानी गरेकोमा आर्थिक वर्ष ०७५/७६ को चौथो त्रैमासमा कम्पनीले २१ करोड २४ लाख खुद व्याज आम्दानी गरेको थियो । यसरी खुद व्याज आम्दानी ६ प्रतिशतले मात्र वृद्धि भएको छ ।

खुद मुनाफामा सामान्य वृद्धि :
संचालन मुनाफामा सामान्य ४ प्रतिशतको वृद्धि भएसंगै कम्पनीको खुद मुनाफा पनि सामान्य ५ प्रतिशतले मात्र वृद्धि भएको छ । आर्थिक वर्ष ०७५/७६ को तेश्रो त्रैमासमा १३ करोड २४ लाख खुद मुनाफा गरेको कम्पनीले अहिले भने १३ करोड ९७ लाख खुद मुनाफा गरेको छ ।

कम्पनीको प्रोभिजन रकममा आएको गिरावट र राईट व्याकको कारणले गर्दा पनि कम्पनीको खुद नाफामा ५ प्रतिशतको वृद्धि गर्न सहज भएको छ ।

जगेडा कोष निकै बढ्यो :
कम्पनीको जगेडा कोषमा १२९ प्रतिशतको वृद्धि भएको छ । १० करोड ८१ लाख बाट जगेडा कोष बढेर २४ करोड ७९ लाख पुगेको छ।

सापटी र कर्जा प्रवाहमा सुस्त :
लघुवित्तले आर्थिक वर्ष ७६/७७को चौथो त्रैमाससम्म ५ अर्ब ५४ करोड कर्जा प्रवाह गरेको छ । समिक्षा अवधिमा कर्जा प्रवाह १ प्रतिशतले वृद्धि भएको छ भने सापटी रकम २ प्रतिशतले वृद्धि हुँदै ५ अर्ब २३ करोड पुगेको छ।

प्रतिशेयर आम्दानी १७ रुपैयाँ :
खुद मुनाफामा ठुलो वृद्धि नभएसँगै कम्पनीको प्रतिशेयर आम्दानीमा पनि ठूलो वृद्धि हुन् सकेन । कम्पनीको अहिलेको प्रतिशेयर आम्दानी १७ रुपैंया ४५ पैसा मात्र रहेको छ ।

मूल्य आम्दानी अनुपात ३४ गुणा:
कम्पनीको अन्तिम बजार मूल्य ५९४ लाई आधार मान्दा कम्पनीको मूल्य आम्दानी अनुपात ३४ दशमलव ०४ गुणा आउँछ । कम्पनीको बजार मूल्य र प्रतिशेयर आम्दानीलाई आधार मान्दा कम्पनी “ओभरभ्यालुड” जोनमा रहेको देखिन्छ ।

५ वर्षे लाभांश :
विगत ५ वर्षको लाभांशलाई हेर्दा कम्पनीले आर्थिक वर्ष ०७५/७६मा १७ प्रतिशत बोनस शेयर र कर प्रयोजनका लागि शुन्य दशमवल ८९ प्रतिशत नगद लाभांश सहित १७ दशमलव ८९ प्रतिशत लाभांश दिएको थियो ।

निस्कर्ष:
लकडाउनको कारणले गर्दा कम्पनीलाई व्यापार विस्तार गर्न केही समस्या परेको देखिन्छ । तर पनि होलसेल लघुवित्त भएको कारणले गर्दा अन्य क्षेत्रका कम्पनी भन्दा कम असर पर्ने देखिन्छ । यसरी कम्पनीको चौथो त्रैमासको प्रतिवेदनलाई सन्तोषजनक नै लिनु पर्छ । आर्थिक वर्ष ०७६/७७ को तेश्रो त्रैमासलाई आधार मान्दा चाहीं कम्पनीको व्यापार घटेको छ । तेश्रो र चौथो त्रैमासलाई दाँजेर हेर्दा सापटी रकम र  कर्जा प्रवाहमा सामान्य गिरावट आएको छ ।