करेक्सनमा २ अर्ब ८० करोड माथिको कारोवार हुनुलाई कसरी हेर्ने ? प्राविधिक बिश्लेषणसहित

५ श्रावण, काठमाडाैं । लगानीकर्ताले नाफा बुक गरेको कारणले आज शेयरबजारमा बिक्री चाप आउँदा नेप्से परिसूचक शुन्य दशमलव ९५ प्रतिशतले घट्दै बजार बन्द भएको छ । नेप्से परिसूचक १४६४.९४ को विन्दुमा बन्द भएको छ ।

आज कारोवार रकमले भने निकै राम्रो उचाई समातेको छ । आज  २ अर्ब ८० करोड माथिको कारोवार भएको छ । बजार करेक्सन हुँदा कारोवार रकम यति धेरै बढ्नुलाई खासै सकारातमक मानिदैन् । करेक्सन हुँदा कारोवार घटेको र बजार वृद्धि हुँदा कारोवार वृद्धि भएको सकारात्मक मानिन्छ । 

शुरुवात चरणमा निकै आक्रामक वृद्धि हुँदै सर्किट लागेको बजारमा भने नाफा बुक गर्न खोज्दा बजारमा घट्न पुगेको हो । बजार आज १५३९.३७ को विन्दुमा खुलेको थियो भने १५५६.२०को उच्च विन्दु समातेको थियो । आज बजारले १२ बजेर २ मिनेटमा उच्च विन्दु समातेको थियो । त्यस्तै बजार बन्द हुने बेला २ बजेर ५० मिनेटमा १४५८.५१ को न्यून विन्दु समातेको थियो । बजार न्यून विन्दु भन्दा अलिक माथि १४६४ मा बन्द भएको थियो ।

आज एनएमबी बैंकको सर्वाधिक २० करोड १५ लाख बराबरको शेयर खरिदबिक्री भएको छ । दोश्रोमा नेपाल पुनर्बीमा कम्पनीको १७ करोड  ६४ लाख बराबरको कारोवार भएको छ ।

युनाईटेड फाइनान्सको शेयर मूल्य सर्वाधिक ९ दशमलव ९४ प्रतिशतले वृद्धि भएको छ। आज ३ कम्पनी युनाईटेड फाइनान्स, एनआईसी एशिया लघुवित्त र स्पर्ष लघुवित्तको बजार मुल्य ९ प्रतिशत भन्दा धेरैले वृद्धि भएको छ। त्यस्तै गुराँस लघुवित्त र मन्जुश्री फाइनान्सको बजार मूल्य ९ प्रतिशत भन्दा धेरैले घटेको छ ।

आज चार उपसुचक बैंक, विकास बैंक, फाईनान्स र म्युचुअल फण्डमा मात्र वृद्धि देखिएको छ। बजारलाई ड्राईभ गर्ने वाणिज्य बैंकको उपसुचकमा भने सामान्य वृद्धि भएको छ।

महत्वपूर्ण विन्दुहरु :

प्राविधिक बिश्लेषण :

आज कारोबारको पहिलो समयमा बजार बढ्दो प्रवृत्तिमा रहे पनि पछिल्लो समयमा घट्दो प्रवृत्तिमा रहेको थियो । आजको बजार प्रवृत्तिले बियरिस मारुबोजु मैनबत्तीको चित्र बनाएको छ । यसले बजारमा विक्रेताको चाप रहेको र अर्को कारोबार दिन पनि बजार केही सच्चिन सक्ने सम्भावनालाई नकार्न सकिन्न ।

दैनिकी अवधिमा “आरएसआई” ६४ दशमलब ५१ को बिन्दुमा छ । यो अक्सिलेटरले बजार हालसम्म सकारात्मक रहेको जानकारी दिएको छ ।

“एडिएक्स” र जोड -बिजोड “डाइरेक्सनल इन्डेक्स”हरुले बजारमा क्रेताको चाप रहेको जानकारी गराएको छ । “अन ब्यालेन्स भल्यूम” ले बजारमा विक्रेताको चाप भएको जानकारी गराएको छ ।

नेप्से बढेमा पहिलो प्रतिरोध १५०० को क्षेत्रमा पाउने देखिन्छ र घटेमा पहिलो टेवा १४६० को क्षेत्रमा पाउने देखिन्छ।