पसलका दुई कामदारसहित थप नौ जनामा कोरोनाको पुष्टि, संक्रमितको संख्या ३८५ पुग्यो

◊ धीरुभाइ

५ साउन, सप्तरी । सप्तरीमा कोरोना भाइरस संक्रमणबाट मृत्यु भएका पसलमा काम गर्ने दुई जना कामदारसहित नौ जना पुरुषमा पनि कोरोना संक्रमण पाइएको छ । यससँगै जिल्लामा कूल संक्रमितको संख्या ३८५ पुगेको छ ।

पसलमा काम गर्दै आएका ३७ र ५५ वर्षका पुरुष रहेको स्वास्थ्य कार्यालय सप्तरीका निमित प्रमुख दुनियालाल यादवले बताए । हिजो आइतबार मात्रै उनका परिवारका पाँचै जना श्रीमति, छोरा, बुहारी, नाती नातिनीमा संक्रमण पाइएको थियो । जिल्लामा हालसम्म २६९ जना निको भएर घर फर्किसकेका छन । ११६ जनाको आइसोलेशनमा उपचार भइरहेको बताइएको छ ।

नयाँ थपिएका संक्रमितहरुमा राजविराज नगरपालिकाका तीन, तिलाठी कोइलाडी गाउँपालिकाका तीन, विष्णुपुर गाउँपालिका, बलान बिहुल गाउँपालिका र सुरुङ्गा नगरपालिकाका एक-एक जना रहेको स्वास्थ्य कार्यालयका निमित प्रमुख यादवले बताए । नयाँ थपिएका संक्रमितहरुको राजविराज स्थित गजेन्द्र नारायण सिंह अस्पतालको प्रयोगशालामा स्वाब परीक्षण गरिएको थियो ।

जिल्लाको सबै स्थानीय तहमा संक्रमण

हालसम्म जिल्लामा राजविराज नगरपालिकामा २५, कञ्चनरुप नगरपालिकामा पाँच, डाक्नेश्वरी नगरपालिकामा २५, बोदेबर्साईन नगरपालिकामा ३८, खडक नगरपालिकामा १३, शम्भुनाथ नगरपालिकामा सात, विष्णुपुर गाउँपालिकामा छ, तिरहुत गाउँपालिकामा छ, रुपनी गाउँपालिकामा पाँच जना संक्रमति भेटिएको छ ।

त्यस्तै राजगढ गाउँपालिकामा २२, सुरुङ्गा नगरपालिकामा २१, हनुमाननगर कंकालीनी नगरपालिकामा ५६, अग्निसाइर कृष्ण सवरन गाउँपालिकामा आठ, छिन्नमस्ता गाउँपालिकामा ३२, महदेवा गाउँपालिकामा १५, सप्तकोसी नगरपालिकामा छ, तिलाठी कोइलाडी गाउँपालिकामा ४६ र बलान बिहुल गाउँपालिकामा ४९ जनामा कोरोना पुष्टि भइसकेको छ ।

विभिन्न स्थानीय तहमा सञ्चालित क्वारेन्टाइनमा २२ महिलासहित ४५५ जना रहेको छ । दैनिक २०–२५ जना भारत तथा तेश्रो मुलुकबाट आउने गरेको र सम्पर्कमा आएपछि उनीहरुलाई क्वारेन्टाइनमा राखिने गरेको बताइएकोे छ ।