युट्युबबाट गीत हटाउन गायिका सोफिया थापालाई धम्की

६ साउन, काठमाडौँ । आधुनिक पुस्ताका युवायुवतीले प्रयोग गर्ने शब्द मिसाएर सार्वजनिक गरिएको गायिका सोफिया थापाको तीज गीतमाथि थप विवाद भएको छ ।

‘अबको तीज नो ब्रत प्लिज’ बोलको गीत आइतबार मात्रै सार्वजनिक भएको थियो । गीत सार्वजनिक भएलगत्तै विवादमा परेको थियो ।

मंगलबार बिहानै हिन्दु धार्मिक संगठनका केही व्यक्तिले गीत हटाउन थापालाई दबाब दिएका छन् । गीत युट्युबमा सार्वजनिक भएलगत्तै हिन्दु धर्म संगठनका केही व्यक्तिले फोन गरेरै गीत हटाउन धम्की दिएका गायिका थापाले बताएकी छन् ।

हिन्दु जागरण र विश्व हिन्दु युवा संघ अन्तर्राष्ट्रिय समितिका नाममा केही व्यक्तिले बिहानैदेखि फोन गरेर निरन्तर धम्की दिइरहेका गायिका थापाको गुनासो छ ।

सोमबार नै विश्व हिन्दु युवा संघ अन्तर्राष्ट्रिय समिति नामक संस्थाले प्रेस विज्ञप्ती जारी गरेर गीत हटाउन दबाब दिएको थियो । गीत नहटाए आक्रमण गर्ने धम्की पनि आएको थापाले बताएकी छिन् ।