सिद्धार्थ राजमार्ग एकतर्फी रुपमा खुल्यो

६ साउन, काठमाडौं । लगातारको वर्षासँगै पहिरोले अवरुद्ध सिद्धार्थ राजमार्ग बेलूकीदेखि खुलेको छ । पहिरोले अवरुद्ध बनेको बुटवल–पाल्पा सडक खण्ड मंगलवार साँझदेखि एकतर्फी रुपमा खुलेको हो ।

सिद्धबाबा मन्दिर, हेडबक्स, नाग मन्दिर, पैठेडाँडा, दोभान, झुम्सा, गिटीखानी, चर्चरे, कालीमाटी, गौडेपुल लगायत दर्जन बढी स्थानमा गएको पहिरो केही पन्छाएर एकतर्फी हिड्ने बाटो बनाइएको हो ।

सोमवार ३ घण्टा खुलेर अवरुद्ध भएको सिद्धार्थ राजमार्गको पाल्पा–बुटवल सडकखण्ड मंगलवारबाट एकतर्फी खुलेको हो । ५ नम्बर प्रदेश ट्राफिक प्रहरी कार्यालय बुटवलका डीएसपी डिल्लीनारायण पाण्डेले सानाठूला सबै पहिरो र बाटोमा जम्मा भएको लेदो हटाएर सडक खुलाइएको बताए ।