पूर्व केन्द्रिय सदस्य भन्छन :- कांग्रेस नेतृत्व नै आदर्श, विचार र सिद्धान्तलाई समाप्त गर्न लागेको छ

◊ धीरुभाइ

६ साउन, सप्तरी । कांग्रेस नेतृत्वबाटै आदर्श, विचार र सिद्धान्तलाई समाप्त गर्न लागेको आरोप नेपाली कांग्रेसका पूर्व केन्द्रिय सदस्य तथा पूर्व गृहराज्य मन्त्री रामकुमार चौधरीले लगाए । सप्तरीको हनुमाननगर कंकालीनी नगरपालिका स्थित महावीर माध्यमिक विद्यालयमा बीपी कोइरालाको ३८ स्मृति दिवसको अवसरमा मंगलबार आयोजित अन्तरक्रिया तथा बृक्षारोपन कार्यक्रममा उनले यस्तो बताए ।

अन्तरक्रिया मा नेता चौधरीले पार्टीको महाधिबेशनको तिथि तय भइसकेको अवस्थामा मनोनय गरेर चुनावी प्रक्रियालाई प्रभाव पार्न खोजेको आरोप लगाए । कांग्रेस सभापति शेरबहादुर देउवाले महाधिबेशनको पूर्वसध्यामा आफ्नो पकड बनाउन मनोनयनको बाटो रोजेको भन्दै पूर्व राज्यमन्त्री चौधरीले भने, पार्टीलाई गलत दिशामा जान नदिन आन्तरिक द्वन्द्वबाट मुक्त बनाउनु पर्छ । र, बीपीको आदर्श, सिद्धान्त र विचारलाई जिवित राख्न सशक्त रुपमा अगाडी बढ्नु पर्दछ ।

वर्तमान सरकार भ्रष्टाचारमा लिप्त भएकोले कोरोनाको महामारी, बाढी पहिरोका कारण समस्यामा परेका जनताप्रति सरकार निरिह सावित भएको उनले बताए । सरकार पूर्ण रुमा असफल भएकै कारण जनतामा निराश छाएको उनको कथन थियो ।  क्षेत्र नम्बर १ को सभापति बद्री महत्मान यादवको अध्यक्षतामा आयोजित सो कार्यक्रममा जिल्ला नेता रामदेव साहले बीपीको स्मृति दिवस मनाउने तर उनको सिद्धान्त, विचारलाई आत्मसात नगर्ने परिपाटी पार्टीको केन्द्रिय नेतृत्वमा रहेको बताए ।

सो कार्यक्रममा नेपाली कांग्रेस नेताहरु हेमनारायण चौधरी, ललनप्रसाद गुप्ता, हनुमाननगर व्यापार संधका अध्यक्ष तथा कांग्रेसका जिल्ला सदस्य हेमन्त जैन, रन्जन साह, रामअवतार यादव लगायतले बीपीको मार्गमा चल्न सकिएमा काँग्रेस एक ढिक्का हुने बताए । अन्तक्र्रियापछि विद्यालयका प्राङ्गणमा निम, जामुन, गमहाइर लगायत विभिन्न जातको बृक्षहरु रोपेका छन ।