कोरोनाले नेपालमा पहिलो विदेशीको मृत्यु

७ साउन, काठमाडौं । कोरोना भाइरसका कारण नेपालमा पहिलो विदेशीको मृत्यु भएको छ । काठमाडौंको शिक्षण अस्पतालमा उपचाररत् एक चिनियाँ नागरिकको कोरोनाले गर्दा मृत्यु भएको अस्पतालका निर्देशक डा. रोहित पौडेलले बताए । यससँगै नेपालमा कोरोना संक्रमणबाट मृत्यु हुनेको संख्या ४२ पुगेको छ ।

शिक्षण अस्पतालमा ५८ वर्षीया चिनियाँ महिलाको कोरोना संक्रमणबाट मृत्यु भएको हो । हिजो बेलुकी अचानक अस्पताल भर्ना भएकी उनमा कोरोना संक्रमण देखिएको हो ।

शुरुमै उनलाई उपचारका लागि ग्राण्डी अस्पताल लगिएको थियो । तर ग्राण्डीले उनलाई शिक्षण अस्पताल रिफर गरेको थियो । शिक्षण अस्पतालमै उनको मृत्यु भएको हो । नेपाली सेनाले उनको शब व्यवस्थापनबारे तयारी थालेको छ ।