प्रधानमन्त्री ओली र कांग्रेस सभापति देउवाबीच भेटवार्ता

८ साउन, काठमाडौं । प्रधानमन्त्री केपी शर्मा ओली र कांग्रेस सभापति शेरबहादुर देउवाबीच भेटवार्ता भएको छ । बिहीबार बिहान भएको भेटवार्तामा समसामयिक विषयमा कुराकानी भएको नेताहरुले बताएका छन ।

प्रधानमन्त्री ओलीसँगको भेटमा कांग्रेस सभापति देउवाले कोरोना र बाढी पहिरोका सम्बन्धमा नेपाली कांग्रेसका तर्फबाट विशेष ध्यानाकर्षण गराएका थिए । कोरोना संक्रमितको संख्या २० हजार पुग्न लागेको र ४३ जनाको मृत्यु भएको अवस्थामा लकडाउन खुलेपछिका चुनौती सामना गर्न नयाँ र विशेष रणनीति बनाउन देउवाले ओलीलाई सुझाव दिएका छन् ।

बाढी–पहिरो पीडितको सरकारले उद्धार, राहत र पुनर्स्थापनाका लागि युद्धस्तरमा काम गर्न र कोरोनाबाट उब्जिएका समस्याहरुलाई गम्भीरतापूर्वक लिएर सम्बोधन गर्न पनि देउवाले प्रधानमन्त्री ओलीको ध्यानाकर्षण गराएका हुन् ।

सत्तारुढ नेकपा आन्तरिक किचलोमा फसिरहेका बेला कांग्रेस सभापति देउवाले ओलीलाई भेटेरै कोरोना नियन्त्रण र बाढी पहिरोमा परेकाहरुको उद्धार र राहतमा ध्यान दिन सुझाएका छन् ।