सत्याग्राही युवाहरुको माग पूरा गर्न राप्रपा अध्यक्ष राणाको सुझाव

८ साउन, काठमाडौं । राष्ट्रिय प्रजातन्त्र पार्टी राप्रपाका अध्यक्ष पशुपति शमशेर राणा जवराले सत्याग्रही युवाहरूसँगको संझौता सरकारले अविलम्ब पालना गर्न माग गरेका छन् । सामाजिक सञ्जालमा ट्वीट गर्दै राणाले सरकार आफ्नो बचन र निष्ठामा अडेर नागरिकका माग पूरा गर्नुपर्ने बताए ।

‘सरकारले संझौता पूरा नगरेपछि ६ दिन भयो ईः, करण गुरुङ, समैरा श्रेष्ठ बिना खाना पानी सत्याग्रहमा बसेको,’ राणाले बिहीबार ट्वीट गर्दै भनेका छन, ‘सत्याग्रही, नागरिकलाई छल गर्नु सरकारको निष्ठा र बुद्धिमानी होइन । बन्दाबन्दी हट्दा संक्रमण झन् बढ्न सक्नेछ । यसैले कोभिड–१९ सबल व्यवस्थापनको बाचा सरकारले अविलम्ब पालना गर्न जरुरी छ ।’

कोरोना रोकथाम गर्नका लागि पीसीआर परीक्षण अनिवार्य गर्नुपर्ने माग गर्दै ‘इनफ इज इनफ’ अभियान संचालन गर्ने क्रममा युवाहरुले १२ दिन आमरण अनसन बसेका थिए । त्यतिबेला सरकारले उनीहरुका माग सम्बोधन गर्न १२ बुँदे सम्झौता गरेको थियो ।

तर सरकारले सम्झौता पूरा नगरेपछि फेरि युवाहरु फेरि बसन्तपुरमा आमरण अनसनमा बसेका छन् ।