माधव नेपाल र बामदेवबीच गोप्य भेटवार्ता

८ साउन, काठमाडौं । सत्तारुढ नेकपाका वरिष्ठ नेता माधवकुमार नेपाल र उपाध्यक्ष बामदेव गौतमबीच ‘गोप्य’ भेटवार्ता भएको छ । काठमाडौँको नागपोखरीस्थित ‘इमा गो डे क्याफे’मा बिहीबार दिउँसो भएको गोप्य भेटवार्तामा सत्तारुढ नेकपाभित्रको आन्तरिक विवाद समाधानका विषयमा छलफल भएको स्रोतले बताएको छ ।

अहिले नेकपाभित्र अध्यक्षद्धय ओली र प्रचण्डबीच हप्तौ वार्ता भएपनि टुंगोमा पुग्न सकेको छैन् । यद्दपि उनीहरु बीच कुनै गोप्य सहमति भएको आशंका माधव नेपाल समुहको छ । दुई नेताबीच भएको सहमति सार्वजनिक नभएपछि अनेकन आशंका उब्जिएका छन् र नेकपाका अरु नेताहरु पनि असन्तुष्ट छन् ।

पछिल्लो समय ओली र प्रचण्डबीच गोप्य सहमति भएको भनिएपछि नेकपाभित्र अर्को तरंग उत्पन्न भएको हाे । खासगरी प्रचण्डलाई आगामी महाधिवेशनबाट एकल अध्यक्ष बनाउन ओलीले सहयोग गर्ने गोप्य प्रस्ताव बाहिरिएपछि नेकपाभित्र प्रचण्डबाट वरिष्ठ नेता माधवकुमार नेपाल लगायतका नेताहरु झस्किएका छन् ।

ओली र प्रचण्डले समेत आफूलाई धोका दिने स्पष्ट संकेत पाएपछि माधव नेपाल र बामदेवबीच गोप्य भेटवार्ता भएको आंकलन गरिएको छ । प्रचण्ड र ओलीबीच महिनौ छलफल तथा वार्ता हुँदा पनि सहमति हुन नसकेका बेला नेकपाका प्रभावशाली नेताबीचको ‘गोप्य’ भेटवार्तालाई अर्थपूर्ण रुपमा हेरिएको छ ।

ओली–प्रचण्डको चोचोमोचोविरुद्ध !

केही दिनअघि प्रधानमन्त्री ओलीले अर्का अध्यक्ष प्रचण्डलाई आगामी महाधिवेशनबाट एकल अध्यक्ष बन्न प्रस्ताव गरेका थिए । अहिले आफूलाई सहयोग गरेको खण्डमा मंसिरमै महाधिवेशन गरेर प्रचण्डलाई एकल अध्यक्ष बनाईदिने ओलीको प्रस्ताव थियो ।

तर प्रचण्डले सो प्रस्ताव सजिलै पत्याएनन् । पछि ओलीले शीतलनिवासमा लगेर राष्ट्रपति विद्यादेवी भण्डारी, महासचिव विष्णु पौडेल, प्रदेश ५ का मुख्यमन्त्री शंकर पोखरेल र जनार्दन शर्मालाई समेत साक्षी राखेर प्रचण्डलाई आगामी महाधिवेशनबाट एकल अध्यक्ष बन्न सहयोग गर्ने प्रस्ताव गरे । राष्ट्रपतिलाई नै साक्षी राखेपछि प्रचण्डले पनि ओलीको प्रस्तावमा समर्थन जनाएको नेताहरुको भनाई छ ।

तर शीतलनिवासमा गोप्य भनिएको सहमति सोही साँझ सञ्चारमाध्यममार्फत बाहिरिएपछि नेकपा वरिष्ठ नेता नेपाल, झलनाथ खनाल र बामदेव गौतम लगायका नेतारु प्रचण्डसँग रुष्ट बने । ओलीविरुद्ध सबै नेता लागेपनि सहमति गर्दा प्रचण्ड एक्लैले गर्ने र फाइदा पनि आफै मात्रै लिने गरेको भन्दै नेपाल लगायतका नेताहरु उनीसँग असन्तुष्ट थिए ।

भोलिपल्ट अध्यक्ष प्रचण्डले खुमलटारमा भेला नै गरेर ओलीले गरेको प्रस्तावबारे ‘बिफ्रिङ’ गरे । खासगरी ओली र प्रचण्डबीचको ‘चोचोमोचो’ मन नपराएका माधव नेपालले खुमलटार भेलामा प्रचण्डको रवैयाबारे स्पष्ट रुपमा असन्तुष्टि जनाए । आफूहरुसँग छलफल, रणनीति बनाउने तर सहमति गर्दा एक्लै गर्ने र हामीलाई बेवास्ता गर्ने भन्दै माधव नेपाल प्रचण्डसँग रिसाएका थिए ।

जवाफमा प्रचण्डले आफूलाई झुक्याएर शीतलनिवास लगेर परिबन्दमा पारिएको बताए । एक किसिमले प्रचण्डले माधव नेपाल लगायतका नेताहरुसँग झुट नै बोले । सो झुटपछि प्रचण्डसँग पूर्वमाओवादी नेताहरु समेत रुष्ट बनेका छन् । शीतलनिवासमा ओली र प्रचण्डबीचको सहमतिको साक्षी बनेका जनार्दन शर्मा पनि हिजोआज प्रचण्डसँग रुष्ट छन् ।

स्थायी कमिटीका नेताहरु समेत सहभागी खुमलटार भेलामा बामदेव भने गएका थिएनन् । बामदेवसँगै गृहमन्त्री रामबहादुर थापा बादल पनि सहभागी भएनन् । जुन कुराले प्रचण्ड गुटमा पनि शंका उत्पन्न हुनुका साथै नेताहरुबीचमा एकअर्काप्रति भरोसा टुटेको छ ।

यसका साथै प्रधानमन्त्री ओलीले प्रचण्डलाई मदन भण्डारीले सम्पादन गरेको जनताको बहुदलीय जनवाद ‘जबज’ स्वीकार गरेर प्रवक्ता बन्न र अहिले आफूलाई सहयोग गर्न प्रस्ताव पनि गरेका थिए । जसमा प्रचण्डको धेरैथोरै समर्थन रहेको पनि नेताहरुको भनाई छ । आगामी महाधिवेशनबाट जसरी पनि अध्यक्ष बन्ने दाउमा प्रचण्ड छन् ।

ओलीसँगको त्यो गोप्य सहमतिपछि प्रचण्डसँग माधव नेपाल र बामदेव बढी नै झस्किएका छन् । पछिल्लो समय ओलीप्रति नरम हुदै गएका बामदेवले केही मिडियामा आफूले प्रधानमन्त्रीको राजीनामा नमागेको समेत बताउने गरेका छन् । ओलीप्रति नरम हुदै गएका बामदेव र यसपटक प्रचण्डसँग पनि झस्किएका माधव नेपालबीच बिहीबार खास छलफल भएको अनुमान छ । जसले नेकपाभित्रको अहिलेको समीकरण फेरिन सक्ने सम्भावना छ ।