संविधान नै धरापमा पर्दा समेत देउवा सत्ताको मोलाहिजामा लागेको नेता केसीको आरोप

८ साउन, काठमाडौं । नेपाली कांग्रेसका प्रभावशाली नेता एवं पूर्वमन्त्री अर्जुननरसिंह केसीले सिंहदरवारको निहित स्वार्थमा राष्ट्रपतिले चालेका कतिपय असंवैधानिक क्रियाकलापले लोकतान्त्रिक संविधान नै धरापमा पर्न थालेको बताएका छन् ।

आज सामाजिक सञ्जाल फेसबुक र टुवीटरमा प्रतिक्रिया लेख्दै नेता केसीले भनेका छन् “सम्मानित तथा संवैधानिक राष्ट्रपति निर्विवाद, सर्वमान्य, साझा संस्था र राष्ट्रिय एकताको प्रतीक भएर आफ्नो मर्यादामा रहनुपर्छ । तर सिंहदरवारको निहित स्वार्थको इच्छामा सत्तारुढ पार्टीको गुटविशेषको लागि राष्ट्रपतिका कतिपय असंवैधानिक राजनीतिक गतिविधिले गम्भीर विवाद उठाउन थालेपछि संविधान धरापमा पर्न थालेको अनुभव टडकारो हुँदैछ ।”

कार्यपालिका, न्यायपालिका, संसद, संवैधानिक अंगहरूको स्वतन्त्र, संवैधानिक जिम्मेवारी र कर्तव्य संविधानको अक्षर र भावनाअनुरुप पूर्ण इमान्दारीका साथ पालन गर्नु–गराउनु पनि राष्ट्रपतिको अनिवार्य जिम्मेवारी भएको नेता केसीको तर्क छ ।

नेता केसीले कांग्रेस सभापति शेरबहादुर देउवा प्रति कटाक्ष गर्दै प्रमुख प्रतिपक्ष दलको नेताको हैसियतले देउवाले निर्वाह गर्नुपर्ने बिरोधी धार र खवरदारीको भूमिका निभाउन नसकेको आरोप लगाएका छन् ।

नेता केसीले प्रतिपक्षी दलले निर्वाह गर्नुपर्ने विरोधी धार र खबरदारीको भूमिका पुरा नगरी सत्ताको मोलाहिजा, भागबन्डा, सल्लाह–साउती र अपारदर्शी साँठगाँठमा रमाएको गम्भीर आरोप पनि सभापति देउवामाथि लगाएका छन् । होइन भन्ने धरातलीय यथार्थता काममा परिणति गरेर देखाउन देउवालाई चुनौती दिएका छन् ।