प्रचण्ड रणनीति :- सत्तामा ओलीसँग, विचारमा नेपालसँग

समाचार टिप्पणी

९ साउन, काठमाडौं । सत्ताधारी नेपाल कम्युनिष्ट पार्टीभित्रको अन्तरसंघर्षमा अस्थायी युद्धविराम गर्न प्रधानमन्त्रीसमेत रहेका पार्टीका एक नम्बरी अध्यक्षले अर्ली महाधिवेशनको प्रस्ताव त गरे, तर यो प्रस्ताव असन्तुष्टहरुले पत्याएनन् । गत शनिबारको सचिवालय बैठकमा केपी ओलीले आफू अध्यक्षबाट हट्नैपर्ने भए मंसिरमा अधिवेशन गरेर छाड्न तयार भएको सन्देश दिए ।

यसअघि उनले अर्का अध्यक्ष पुष्पकमल दाहाल प्रचण्डलाई यसबारे जानकारी दिईसकेका थिए । त्यति मात्र हैन ओलीले मंसिरमा हुने अर्ली अधिवेशनबाट एकल अध्यक्ष नै बनाउन बचनै दिएका थिए । त्यसैको असर देखियो सचिवालय बैठकमा । ओलीले अध्यक्षबाट हट्न तयार रहेको तर अर्ली अधिवेशनमा जानुपर्ने शर्त तेस्र्याए । लगत्तै प्रचण्डले सहमति जनाएका थिए । तर वरिष्ठ नेता झलनाथ खनाल, माधव नेपाल, बामदेव गौतम र नारायणकाजी श्रेष्ठले पत्याएनन् । नेता नेपालले त मुखै फोरेर भने– दुई अध्यक्षको चोचोमोचो मिलेर समग्र समस्याको हल निस्कँदैन ।

यो परिघटनाले नेकपा भित्रको विवादलाई नयाँ चरणमा प्रवेश गराइदिएको छ । गत शनिबार साँझबाट प्रचण्डको मनस्थिति फेरि बदलिएको छ । दिउँसोको सचिवालय बैठकअगाडि ओलीले प्रचण्डलाई निशर्त एकल अध्यक्ष बनाउने वचन दिएकोमा साँझ शीतल निवासमा शर्त तेस्र्याइयो । जनताको बहुदलीय जनवादलाई राजनीतिक कार्यदिशा स्वीकारे प्रचण्डलाई एकल अध्यक्ष बनाउने प्रस्ताव आयो । यो प्रस्तावले प्रचण्ड बिच्किएका छन् । प्रचण्डपथलाई राजनीतिक कार्यदिशा बनाएर देश हल्लाएको बिगतले भत्भती पोलेको छ । शीतल निवासबाट यस्तो प्रस्ताव आएपछि भने प्रचण्ड सिताङ्ग भएका छन् ।

त्यसपछि भने प्रचण्डले नेपाल पक्षसँगकै सहकार्यलाई निरन्तरता दिने सोच बनाए । यद्यपि प्रचण्ड निकट अधिकांश नेताले भने ओलीसँग नै सम्झौता गरे अगाडि बढ्दा बढी फाइदा पुग्ने निश्कर्ष निकालेका छन् । सबैको कुरा सुन्ने बानी भएका प्रचण्ड निर्णय भने आफूलाई लागकै गर्ने नेतामा गनिन्छन् ।

यो प्रकरणमा पनि प्रचण्ड सबैको नाडी छाम्दैछन् । अन्ततः प्रचण्डले ओलीसँग सत्ता र नेपालसँग विचारको सहमति गर्ने दाउ निकालेको निकटवर्ती स्रोतको दावी छ । ओलीलाई हटाउन सहज नभएकाले अर्ली महाधिवेशनमा सहमति गर्ने र सकेको सत्ता बाँडफाँड गर्ने तथा महाधिवेशनमा भने नेपालसँग सहकार्य गरेर कब्जा गर्ने रणनीति बनाएको बुझिएको छ ।

प्रचण्डले ओलीसँग सम्झौता गर्न लागेको हल्ला चलाइएको भएपनि त्यस्तो अवस्था नरहेको बताइएको छ । शीतलनिवासले जबजको शर्त नराखेको भए ओलीसँग तत्कालै सम्झौताको सम्भावना रहेका भएपनि अब भने नेपालसँगै दीर्घकालिन सहमति जुटाउने पक्षमा प्रचण्ड उभिने अनुमान गरिएको छ । यसका लागि प्रचण्ड र नेता नेपालबीच पटकपटक वार्ता भइरहेको पनि स्रोतको दावी छ । वार्ता लगभग अन्तिम चरणमा पुगेको र सम्भवतः एक दुई दिनमै लिखित सहमति हुने सम्भावना रहेको बताइन्छ ।

स्रोतका अनुसार, आगामी महाधिवेशनमा नेपाल र प्रचण्ड मध्ये एकजना अध्यक्ष र अर्कालाई प्रधानमन्त्री बनाइने सहमतिको खाका तयार भएको छ । साथै, वरिष्ठ नेता खनाल, उपाध्यक्ष बामदेव गौतम र प्रवक्ता नारायणकाजी श्रेष्ठलाई समेत व्यवस्थापन गर्ने गरी सम्झौताको खाका तयार गरिंदैछ । तत्कालका लागि ओलीसँग सहकार्य र दीर्घकालका लागि नेता नेपालसँग एकता गर्दा बढी लाभ हुने ठहर प्रचण्डले गरेका छन् । यसपछिको निर्वाचनसमेत जित्नका लागि यस्तो रणनीति तयार गरिएको उनी निकट नेताको दावी छ ।

तर प्रचण्ड निकट नेताहरु हरिबोल गजुरेल, बर्षमान पुन र जनार्दन शर्मा भने पार्टी एकता गर्दा ओलीसँग सहकार्य भएकाले अहिले उनलाई छाडेर नेपालसँग मिल्दा अफ्ठेरो पर्न सक्ने पक्षमा रहेका छन् । अहिले ओलीलाई कर्नरमा पारेर नेपालसँग मिल्दा भोलि महाधिवेशनमा ओलीले सहयोग नगर्ने बरु आफैं उम्मेदवार हुन सक्ने अवस्थाप्रति पनि प्रचण्डलाई सचेत गराइरहेका छन् ।

त्यसैले नै प्रचण्ड केही समय पर्खने पक्षमा रहेका छन् । भोलिको सम्भावित जोखिम र प्रभावबारे सुक्ष्म विश्लेषण गरेर मात्रै निश्कर्षमा पुग्ने उनको सोच रहेको छ । तर प्रचण्डले आफूलाई फाइदा पुग्ने भन्दा बढी कसैलाई पनि साथ र सहयोग नगर्ने विगतदेखिको इतिहासले धेरै कुराको सङ्केत गरिरहेको छ ।