ओलीकै सक्रियतामा एमाले दर्ता भएको प्रचण्डको आरोप

९ साउन, काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओली पार्टी फुटाउन उद्धत रहेको आरोप लगाएका छन् । शुक्रबार पुष्पलाल स्मृति दिवसको अवसरमा काठमाडौंमा आयोजित कार्यक्रममा बोल्दै प्रचण्डले ओलीले पार्टी फुटाउनैका लागि नेकपा एमाले पार्टी दर्ताका लागि निर्वाचन आयोगमा निवेदन दिन लगाएकाे आरोप लगाएका हुन् ।

यसअघि एमाले पार्टी दर्ताका लागि निर्वाचन आयोगमा निवेदन परेको थियो । सोही निवेदनका कारण नेकपाको स्थायी कमिटी बैठक स्थगित हुने कारण नै हुन पुगेको थियो । पछिल्लो समय ओलीसँगको एकल वार्ता पनि निष्कर्षमा पुग्न नसकेपछि प्रचण्डले सार्वजनिक कार्यक्रममार्फत ओलीको आलोचना गर्न थालेका छन् ।

यसको पहिलो प्रहारका रुपमा शुक्रबारको अभिव्यक्तिलाई लिइएको छ । भाषणका क्रममा प्रचण्डले लिपुलेक, लिम्पियाधुरा र कालापानीसहितको नक्सा सार्वजनिक गर्ने निर्णय पार्टीको भएको र पार्टीकै दबाबपछि मात्रै सरकारको नीति तथा कार्यक्रममा यो विषय आएको दावी गरेका छन् । तर अहिले ओलीले मात्रै नक्सा सार्वजनिक गरेको दावी भ्रमपूर्ण प्रचार मात्रै भएको पनि प्रचण्डको भनाई छ ।