थप १३३ जनालाई कोरोना, १०७ जना डिस्चार्ज

९ साउन, काठमाडौं । नेपालमा थप १ सय ३३ जनालाई कोरोना भाइरसको संक्रमण पुष्टि भएको छ । शुक्रबार विभिन्न प्रयोगशालामा गरिएको परीक्षणमा १ सय ३३ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

देशका विभिन्न प्रयोगशालामा ३ हजार ९ सय ८७ जनाको परीक्षण गरिएको थियो । यसमध्ये १ सय ३३ जनाको रिर्पोट पोजेटिभ आएको मन्त्रालयका प्रवक्ता जागेश्वर गौतमले जानकारी दिए । यससँगै नेपालमा कोरोना संक्रमितको संख्या १८ हजार ३ सय ७४ पुगेको छ ।

यस्तै शुक्रबार १ सय ७ जना अस्पतालबाट डिस्चार्ज भएका छन् । यससँगै कोरोना जितेर घर फर्किनेको संख्या १२ हजार ९ सय ४७ पुगेको छ ।

अहिलेसम्म कोरोनाले ४४ जनाको ज्यान गएको छ । शुक्रबार मात्रै विरगञ्जमा ८५ बर्षीय एक बृद्धको उपचारका क्रममा कोरोनाले मृत्यु भएको थियो । यसअघि हिजो दुई जनाको ज्यान गएको थियो ।