काठमाडौंमा थप १० जनालाई संक्रमण

९ साउन, काठमाडौं । शुक्रबार काठमाडौं उपत्यकामा थप १० जनालाई कोरोना संक्रमण पुष्टि भएको छ । शुक्रराज ट्रपिकल सरुवा रोग टेकुमा गरिएको परीक्षणमा पाँच जनामा र त्रिवि शिक्षण अस्पताल महाराजगञ्जमा गरिएको परीक्षणमा पाँच जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता डा. जागेश्वर गौतमका अनुसार शुक्रबार देशभर १ सय ३३ जनामा संक्रमण पुष्टि भएको थियो । यसमध्ये काठमाडौंमा मात्रै १० जना थपिएका हुन । पछिल्लो समय काठमाडौंमा दैनिक संक्रमितको संख्या बढ्दै गएको छ ।

यससँगै कोरोना संक्रमितको संख्या १८ हजार ३ सय ७४ पुगेको छ। हाललसम्म कोरोना जितेर घर फर्किनेको संख्या १२ हजार ९ सय ४७ पुगेको छ। पछिल्लो २४ घण्टामा मात्रै १ सय ७ जना संक्रमित डिस्चार्ज भएका थिए ।