बीरगञ्जमा कोरोनाले एक किशोरीको मृत्यु

९ साउन, काठमाडौं । पर्साको बीरगञ्जमा एक किशोरीको मृत्यु भएको छ । बीरगञ्जको गण्डक अस्थायी कोभिड अस्पतालमा उपचाररत १७ बर्षीया किशोरीको मृत्यु भएको अस्पतालले जनाएको छ ।

उनको आरडीटी रिर्पोट पोजेटिभ आएको थियो । पीसीआर परीक्षणका लागि स्वाब संकलन भएपनि रिर्पोट आएको छैन् । बारा परवानीपुर गाउँपालिका–४ घर भएकी १७ बर्षकी किशोरीको वीरगञ्जको गण्डक कोभिड अस्पतालमा मृत्यु भएको डाक्टरले बताएका छन् ।

शुरुमा नारायणी अस्पतालमा भर्ना भएकी उनलाई पछि बीरगञ्ज हेल्थ केयर अस्पताल ल्याइएको थियो । आरडीटी एन्टीबडी पोजेटिभ देखिएपछि कोरोना संक्रमणको आशंकामा बिहीबार गण्डक कोभिड अस्थायी अस्पतालमा भर्ना गरिएकोमा शुक्रबार अपरान्ह मृत्यु भएको हो ।

अब पीसीआर परीक्षण रिर्पोट आएपछि मात्रै उनको शब व्यवस्थापन गरिने भएको छ । यसअघि बीरगञ्जमा दुई जनाको कोरोनाले मृत्यु भइसकेको छ ।