अस्पतालले उपचार गर्न नमान्दा बिरामीको एम्बुलेन्समै मृत्यु

९ साउन, विराटनगर । अस्पतालले उपचार गर्न नमान्दा विराटनगरमा एक युवकको एम्बुलेन्समै मृत्यु भएको छ । शुक्रबार दिउँसो नोबल अस्पताल र कोशी अस्पतालले उपचार गर्न नमान्दा उदयपुरका २३ वर्षका पदम राईको एम्बुलेन्समै मृत्यु भएको उनका आफन्तले बताएका छन् ।

दिउँसो साढे २ बजे एम्बुलेन्समा कोशी अस्पताल ल्याइएका युवकलाई चिकित्सकले उपचार गर्न नमान्दा साढे ३ बजेतिर एम्बुलेन्समै मृत्यु भएको हो । त्यसअघि शुक्रबार नै नोबल मेडिकल कलेजले उपचार गर्न नमानेपछि उनलाई कोशी अस्पताल ल्याइएको थियो ।

स्वासप्रश्वासमा समस्या देखिएपछि पदमलाई श्रीमती कमला र बहिनी चमेलीले बिहीबार कटारी अस्पताल लगेका थिए । कटारी अस्पतालले रेफर गरेपछि उनीहरुले शुक्रबार विराटनगरको नोबल मेडिकल कलेज ल्याएका थिए । दिउँसो २ बजेसम्म उनको अवस्था सामान्य थियो । बेलाबेला श्वास प्रश्वासमा समस्या भएकाले अक्सिजन लगाएका थिए ।

नोबेलले एम्बुलेन्सबाट बिरामी लिन स्ट्रेचरसमेत ल्यायो । तर पछि कोरोना जाँच गराएर मात्र आउन भन्दै अस्पतालले भर्ना लिन मानेन । त्यसपछि एम्बुलेन्स चालक सुवास तामाङले साढे २ बजे कोशी अस्पताल ल्याए । तर सरकारी अस्पतालले पनि एम्बुलेन्सबाट बिरामी झार्न दिएन ।

अस्पतालले भर्ना लिनै नमानेपछि एम्बुलेन्समा करिब एक घण्टापछि उनको मृत्यु भएको थियो । युवकको मृत्यु भएपछि उनका आफन्त आक्रोििशत भएका छन् । यसअघि सरकारले निश्चितता नभई बिरामीलाई रिफर नगर्न परिपत्र गरेको थियो ।

तर स्वास्थ्य तथा जनसंख्या मन्त्रालयको परिपत्र नै बेवास्ता गरेर सरकारी नै रहेको कोशी अञ्चल अस्पतालले नै बिरामीको ज्यान जाने अवस्था सिर्जना भएको हो ।