धरानमा बीपीको तस्बिर नराखे आान्दोलन गर्ने तरुण दलको चेतावनी

११ साउन, काठमाडौं । बीपी कोइराला स्वास्थ्य विज्ञान प्रतिष्ष्ठान धरानमा शुरुवाती समयदेखि राखिएको बीपी कोइरालाको तस्बिर हटाइएकामा नेपाल तरुण दलले आपत्ति जनाएको छ । प्रतिष्ठानको धरान कार्यालयमा सुरुवातदेखि राखिएको तस्बिर हटाइएकामा गम्भिर ध्यानाकर्षण भएको भन्दै तरुण दलले तत्काल तस्बिर नराखे कडा आन्दोलन गर्ने चेतावनी समेत दिएको छ ।

‘महामानव बीपी कोइरालाको तस्बिर वर्तमान उपकुलपतिको निर्देशनमा हटाइएको भन्ने समाचार सुन्नमा आएकोले सो कार्य खेदजनक निन्दनीय कार्य हो । अर्काको अस्तित्व स्विकार गर्न नसक्ने यस्ता घृणित मानसिकता प्रती नेपाल तरुण दलको गम्भीर ध्यानाकर्षण भएको छ’ तरुण दलका अध्यक्ष जितजङ बस्नेतले जारी गरेको विज्ञप्तीमा भनिएको छ, ‘हटाइएको उक्त तस्बिर सोही स्थानमा अविलम्ब नराखिए नेपाल तरुण दल आन्दोलनमा उत्रिन बाध्य हुने हुनेछ र त्यसबाट उत्पन्न हुने सम्पुर्ण परिस्थितिको जिम्मा उपकुलपतिले लिनुपर्ने छ भन्ने चेतावनी पनि दिन चाहान्छौ ।’