लगातार दुई कारोवार दिन देखि “इण्ट्राडे हाई”मा बन्द भएको बजारलाई बिश्लेषण गरेर हेर्दा !

११ साउन, काठमाडाैं । बजार आज पनि बलियो मनोविज्ञानका साथ बन्द भएको छ । नेप्से परिसूचक १ दशमलव ५५ प्रतिशतले बढ्दै दोश्रो बजार बन्द भएको छ । नेप्से परिसूचक १४६५।१० को विन्दुमा बन्द भएको छ । कारोवार रकम १ अर्ब ९४ करोड रहेको छ । कारोवार रकम पनि अघिल्लो कारोवार दिनको तुलनमा वृद्धि भएको हो ।

आज बजार १४४५।६० को विन्दुमा खुलेकोमा १२ बजेर १० मिनेटमा १४४४।७८ को न्यून विन्दु समातेको थियो । त्यस्तै बजारको उच्च विन्दु र अन्तिम विन्दु एउटै रहेको छ। आजको यो प्रवित्तलाई सकारात्मक मानिन्छ । आजको ईण्ट्राडे चार्ट बुलिस रहेको छ।

लगातार दुई कारोवार दिन देखि बजार ईण्ट्राडे हाईमा बन्द भएको र कारोवार रकम पनि वृद्धि हुँदै जानुले खरिदकर्ताको मनोविज्ञान निकै बलियो रहेको देख्न सकिन्छ । बजार वृद्धि हुँदै जाँदा कारोवार रकम पनि वृद्धि हुँदै जानु सकारात्मक पक्ष हो। बजारको उच्च विन्दु र अन्तिम विन्दु एउटै हुनुलाई इण्ट्राडे हाई भनिन्छ। 

प्राविधिक बिश्लेषण :

प्रतिरोध २ः १५००  प्रतिरोध १ः १४८०  टेवा १ः १४५० टेवा २ः १४१७

? आजको कारोबारले बजार बढ्दो प्रवृृत्तिमा रहेको जानकारी गराएको छ । आजको बजार प्रवृत्तिले “बुलिस मारुबोजु” मैनबत्तीको चित्र बनाएको छ । यसले कारोबारको पहिलो समयदेखि अन्तिम समयसम्म बजारमा माग बढी रहेको जानकारी दिनुका साथै अर्को कारोबार दिन पनि बजार बढ्न सक्ने जानकारी दिएको छ ।

? दैनिकी अवधिमा “आरएसआई” ६२ दशमलब ८४ को बिन्दुमा छ। यो अक्सिलेटरले बजार हालसम्म सकारात्मक रहेको जानकारी दिएको छ ।

?“एडिएक्स” र जोड / बिजोड “डाइरेक्सनल इन्डेक्स”हरुले बजारमा क्रेताको चाप हुन थालको जानकारी दिएको छ।

? “अन ब्यालेन्स भल्यूम” ले बजारमा क्रेताको चाप हुन थालेको जानकारी गराएको छ । नेप्से बढेमा पहिलो प्रतिरोध १४८० को क्षेत्रमा पाउने देखिन्छ र घटेमा पहिलो टेवा १४५० को क्षेत्रमा पाउने देखिन्छ।

आज नेपाल लाईफ इन्स्योरेन्सको सर्वाधिक २५ करोड ८४ लाख बराबरको शेयर खरिद बिक्री भएको छ । तारागाउँ रेजेन्सी होटल्स र मिर्मिरे लघुवित्तको शेयर मूल्य सर्वाधिक ९ प्रतिशत भन्दा धेरैले वृद्धि भएको छ । त्यस्तै बेस्ट फाईनान्सको शेयर मूल्य सर्वाधिक ६ दशमलव ५४ प्रतिशतले घटेको छ।

आज तीन उपसुचक होटल, हाईड्रोपावर र म्युचुअल फण्डमा मात्र गिरावट आएको छ । बजारलाई ड्राईभ गर्ने वाणिज्य बैंकको उपसुचकमा भने १ प्रतिशत माथिको वृद्धि देखिएको छ । आज जीवन बीमा र निर्जीवन बीमा उपसुचकमा ठूलो वृद्धि देखिएको छ ।