न्यायाधीशमा पनि कोरोना संक्रमण पुष्टि

११ साउन, सप्तरी । नेपालमा एक जना न्यायाधीशमा पनि कोरोना संक्रमण पुष्टि भएको छ । उच्च अदालत जनकपुरधामको राजविराज इजलासमा कार्यरत ५८ वर्षीय न्यायाधीशमा कोरोना संक्रमण पुष्टि भएको हो ।

जिल्ला स्वास्थ्य कार्यालयका निमित्त प्रमुख दुनियाँलाल यादवका अनुसार यसअघि उच्च सरकारी वकील कार्यालयका प्रमुखमा कोरोना देखिएकामा यसपटक न्यायाधीशमा पनि संक्रमण पुष्टि भएको हो ।

ती व्यक्तिपछि सरकारी वकील कार्यालयका साथै अदालतका न्यायाधीश र कर्मचारीको पनि स्वाब संकलन गरिएको थियो । अन्यको रिपोर्ट आउन अझै बाँकी छ । यस्तै आइतबार नै राजविराजस्थित वडा प्रहरी कार्यालयका एक जना २३ बर्षीय जवान पनि संक्रमित देखिएका छन् । सप्तरीमा यससँगै कोरोना संक्रमितको संख्या ४ सय ३४ पुगेको छ ।