मन्त्रिपरिषद बैठक बस्दै, राखेपको सदस्य सचिव नियुक्तीको तयारी

१२ साउन, काठमाडौं । मन्त्रिपरिषद बैठकको नियमित बैठक आज बस्दैछ । बेलुकी ५ बजे बालुवाटारमा बस्ने बैठकले राष्ट्रिय खेलकुद परिषद् राखेपको सदस्य सचिव नियुक्ति गर्ने तयारी छ । यसबाहेक बैठकले अरु पनि महत्वपूर्ण निर्णय गर्नेछ ।

राखेप सदस्य सचिवका लागि युवा तथा खेलकुद मन्त्रालयले तीन जनाको नाम पठाइसकेको छ । त्यसमध्येबाट मन्त्रिपरिषद बैठकले एक जनालाई नियुक्त गर्नेछ । सदस्य सचिवका लागि रमेशकुमार सिलवाल, अन्जु श्रेष्ठ र लिलबहादुर थापा मगर अन्तिम तीन जनामा परेका छन् ।

उनीहरुमध्ये सिलवाल निवर्तमान राखेप सदस्यसचिव हुन भने अन्जु र लिलबहादुर पूर्व भलिबल खेलाडी तथा भलिबल संघका पदाधिकारी हुन् । यसअघि युवा तथा खेलकुद मन्त्रालयले सदस्यसचिवका लागि आवेदन माग गर्दै तीन जनाको नाम सिफारिस गर्न समिति गठन गरेको थियो ।